ஏரல் அருகே கடனை திருப்பி தராததால் வாலிபர் அடித்துக் கொலை – கொலையாளியை கைது செய்ய கோரி கலெக்டர் அலுவலகம் முற்றுகை !

0
45
earal news

தூத்துக்குடி மாவட்டம், ஏரல் அருகே கொடுத்தக்கடனை திருப்பி தராததால் வாலிபர் அடித்துக்கொலை செய்யப்பட்டிருக்கிறார். அதற்கு காரணமானவர்களை உடனே கைது செய்ய வேண்டும் என கேட்டு அவரது உறவினர்கள் மாவட்ட கலெக்டர் அலுவலகத்தை முற்றுகையிட்டனர்.

தூத்துக்குடி மாவட்டம், ஏரல் அருகே சிறுதொண்டநல்லூர் மரைக்காயர் தெருவைச் சேர்ந்தவர் சாகுல்ஹமீது (வயது 43). இவர் ஆழ்வார்திருநகரியைச் சேர்ந்த கண்ணன் என்பவரிடம் ரூ.1லட்சம் கடன் வாங்கியிருந்தாக தெரிகிறது. இந்நிலையில், சாகுல் ஹமீது கடனை திருப்பி கொடுக்காததால் கண்ணன் உட்பட 6 பேர் சேர்ந்து சாகுல் ஹமீதை கடந்த 14ம் தேதி காரில் கடத்திச் சென்றுள்ளதாக கூறப்படுகிறது.

பின்னர் அவரை ஆழ்வார்திருநகரியில் கண்ணன் நடத்திவரும் மளிகைக் கடையின் பின்புறம் உள்ள இடத்தில் கட்டி வைத்து கொடூரமாகத் தாக்கி துன்புறுத்தியதாகவும் கூறப்படுகிறது. அன்றுமாலை சாகுல் ஹமீதை வீட்டில் இறக்கி விட்டுவிட்டு சென்றுள்ளனர். இதில் படுகாயத்துடன் உயிருக்கு போராடிய சாகுல் ஹமீதை உறவினர்கள் தூத்துக்குடி அரசு மருத்துவமனையில் சேர்த்தனர். அங்கு சிகிச்சை பலனின்றி சாகுல் ஹமீது உயிரிழந்தார்.

இது குறித்து ஏரல் போலீஸ் இன்ஸ்பெக்டர் பட்டாணி கொலை வழக்குப் பதிந்து விசாரணை நடத்தி வருகிறார். இது தொடர்பாக ஏரலைச் சேர்ந்த சோமசுந்தரம் (47) என்பவரை போலீசார் கைது செய்துள்ளனர். மேலும், கண்ணன், மற்றும் அவரது கூட்டாளிகளான முத்துபாண்டி, ஜான், ஆறுமுகநயினார் உட்பட 5 பேரை போலீசார் தேடி வருகின்றனர். கடனை திருப்பித் தராததால் வாலிபரை கடத்தி தாக்கியதால் வாலிபர் உயிரிழந்த சம்பவ அப்பகுதியில் அச்சத்தை ஏற்படுத்தியிருக்கிறது.

இதைத் தொடர்ந்து சாகுல் ஹமீது உறவினர்கள் மற்றும் இஸ்லாமிய அமைப்பினர் தூத்துக்குடி மாவட்ட ஆட்சித் தலைவர் அலுவலகத்தை முற்றுகையிட்டனர். கந்து வட்டி கொடுத்து தாக்கியவர்கள் மீது நடவடிக்கை எடுக்க வேண்டும் எனவும், அதுவரை உடலை வாங்க மாட்டோம் எனவும் கூறி வாக்குவாதத்தில் ஈடுபட்டனர். இதை தொடர்ந்து அவர்களுடன் பேச்சுவார்த்தை நடத்திய காவல்துறையினர் மாவட்ட ஆட்சியரை சந்தித்து மனு அளிப்பதற்கு அனுமதி அளித்தனர்.

தொடர்ந்து ஆட்சியரை சந்தித்து விட்டு வெளியே வந்த சாகுல்ஹமீதின் உறவினர்கள் செய்தியாளர்களிடம் பேசுகையில்,சாகுல் ஹமீது சாவுக்கு காரணமான 6 பேரையும் காவல்துறையினர் கைது செய்யவேண்டும். இறந்தவரின் குடும்பத்திற்கு 25 லட்சம் ரூபாய் இழப்பீடு தரவேண்டும் என மாவட்ட ஆட்சியரை சந்தித்து மனு அளித்துள்ளோம் என்றனர்.

இதுதொடர்பாக மாவட்ட ஆட்சியர் சந்தீப் நந்தூரி கூறுகையில் ஏரலில் கந்துவட்டி பிரச்சனையில் ஒருவர் இறந்திருப்பது குறித்து காவல்துறையினர் வழக்குப் பதிவு செய்து விசாரணை நடத்தி வருகின்றனர். இது தொடர்பாக ஒருவர் கைது செய்யப்பட்டுள்ளார். வழக்கில் சம்பந்தப்பட்ட மற்ற 5 பேரையும் காவல்துறையினர் கைது செய்வதற்கு உரிய நடவடிக்கைகளை எடுத்து வருகின்றனர்.

பொதுமக்கள் கந்துவட்டி வசூல் செய்வது குறித்து உடனடியாக அருகில் உள்ள காவல் நிலையத்தில் புகார் அளிக்கலாம் அல்லது தொடர்புடைய வருவாய் அதிகாரியிடம் புகார் அளிக்கலாம் இல்லையெனில் மாவட்ட ஆட்சியர் அலுவலகத்தில் மனு அளித்தால் அதன் மீது நடவடிக்கை எடுக்கப்படும். மேலும் பாதிக்கப்பட்டவர்களுக்கு அரசின் திட்டங்கள் மூலம் உதவிகள் வழங்குவதற்கும் நடவடிக்கை எடுக்கப்படும் என்றார்.

LEAVE A REPLY

Please enter your comment!
Please enter your name here