ஏப்ரல் 30 ஆம் தேதி வரை ஊரடங்கு உத்தரவு நீட்டிப்பு – முதல்வர் வெளியிட்ட அறிவிப்பு அறிக்கை முழு விபரம் !

0
78
tamilnadu government

ஏப்ரல் 30 ஆம் தேதி வரை ஊரடங்கு உத்தரவு நீட்டிப்பு அறிவிப்பை வெளியிட்டிருக்கிறார் தமிழக முதல்வர் எடப்பாடி பழனிச்சாமி.

அறிக்கையின் முழுவிபரம் :-

’’உலகம் முழுவதும் பரவி வரும் கொரோனா வைரஸ் தொற்று நோயை கட்டுப்படுத்தும் வகையில் தமிழ்நாட்டில் கடந்த 24 3 2020 அன்று மாலை 6 மணி முதல் 31 3 2020 வரை ஊரடங்கு உத்தரவு முதலில் பிறப்பிக்கப்பட்டது. பின்னர் மத்திய அரசு அதை 15.04.2020 அன்று காலை வரை நீடித்தது. ஊரடங்கு உத்தரவு தீவிரமாக கடைபிடிக்கப்பட்டு வருவதன் காரணமாக தமிழ்நாட்டில் நோய்த்தொற்று பெரிய அளவில் பரவாது கட்டுப்படுத்தப்பட்டுள்ளது.

இந்த நிலையில் தற்போது உள்ள ஊரடங்கு உத்தரவை நீட்டிப்பது தொடர்பாகவும் வைரஸ் நோய் தொற்று தொடர்பாக மாநிலங்கள் எடுத்துவரும் நடவடிக்கைகளையும் பிரதமர் காணொலிக் காட்சி மூலமாக 11 4 2020 அன்று கலந்தாய்வு மேற்கொண்டார். இக்கலந்தாய்வின் போது தமிழ்நாட்டில் மேற்கொள்ளப்பட்டு வரும் பல்வேறு தடுப்பு மற்றும் நிவாரண நடவடிக்கைகளும் தமிழ்நாட்டிற்கு போதிய நிதி ஒதுக்க வேண்டும் எனவும் பிரதமரிடம் நான் எடுத்துரைத்தேன்.

மேலும் 30 4 2020 வரை ஊரடங்கு உத்தரவு நீட்டிக்க வேண்டும் என்ற என்னுடைய கருத்தினை தெரிவித்தேன். நானும் மற்ற முதலமைச்சர்களும் நோய் தடுப்பு நடவடிக்கை யான உடங்கு உத்தரவினை நீட்டிக்க வேண்டும் என வலியுறுத்தினோம்.

பிரதமர் அவர்களின் கலந்தாய்வுக் கூட்டத்தில் நடவடிக்கைகளின் அடிப்படையிலும் உலக சுகாதார அமைப்பின் கருத்தின் வடியும் மருத்துவ நிபுணர் குழு மற்றும் பொது சுகாதார வல்லுநர் குழுவின் பரிந்துரைகளின் படியும் மாநிலத்தில் ஊரடங்கு தளர்த்தினால் நோய் தொற்று அதிகரிக்கக்கூடும் என்பதை கருத்தில் கொண்டு 11 4 2020 அன்று நடைபெற்ற அமைச்சரவைக் கூட்டத்தில் எடுக்கப்பட்ட முடிவின்படி பேரிடர் மேலாண்மைச் சட்டம் 2005 இன் படி குற்றவியல் விசாரணை முறை சட்டப்பிரிவு 144 படியும் 30 4 2020 வரை ஊரடங்கு உத்தரவு நீட்டிக்கப்படுகிறது.

கொரோனா நோய் தொற்றினை தடுக்கும் நோக்கில் பேரிடர் மேலாண்மை சட்டம் 2005 இன் படி குற்றவியல் விசாரணை முறை சட்டம் பிரிவு 144 படியும் தற்போது நடைமுறைப்படுத்தப்பட்டு வரும் அனைத்துக் கட்டுப்பாடுகளும் தொடரும்.

1)ஊரடங்கு உத்தரவு நீட்டிக்கப்படும் காரணத்தினால் தமிழ்நாட்டில் உள்ள அரிசி குடும்ப அட்டைதாரர்களுக்கு மே மாதத்திற்கான அத்தியாவசிய பொருட்கள் அனைத்தும் அதாவது ஒரு கிலோ சர்க்கரை ஒரு கிலோ துவரம் பருப்பு ஒரு கிலோ சமையல் எண்ணெய் அரிசி குடும்ப அட்டைதாரர்களுக்கு எப்பொழுதும் வழங்கப்படும் அரிசி ஆகியவை நியாயவிலை கடைகளில் விலை இன்றி வழங்கப்படும்.

2) கட்டட தொழிலாளர்கள் உட்பட பதிவு பெற்ற அனைத்து அமைப்புசாரா தொழிலாளர் குடும்பங்களுக்கு குடும்பம் ஒன்றுக்கு இரண்டாவது முறையாக ஆயிரம் ரூபாய் நிவாரண உதவி வழங்கப்படும்.

3) பிற மாநிலங்களைச் சேர்ந்த தொழிலாளர்களுக்கு மே மாதத்திற்கு 15 கிலோ அரிசி ஒரு கிலோ துவரம் பருப்பு ஒரு கிலோ சமையல் எண்ணெய் விலை இன்றி வழங்கப்படும்.

பல்வேறு தரப்பினரும் இருந்து வந்த கோரிக்கைகளை பரிசீலித்து,

தமிழ்நாட்டில் காலை 6 மணி முதல் மதியம் ஒரு மணி வரையிலான காலத்தில் அடுமனைகள் (பேக்கரி)இயங்க தடை இல்லை என்பதையும் ஏற்கனவே உணவகங்களுக்கு வழங்கப்பட்டுள்ள அறிவுரைகளைப்படி அடுமனைகளிலும் பார்சல் விற்பனை மட்டுமே அனுமதி அளிக்கப்படும் என தெளிவு படுத்தப்படுகிறது.

மேலும் சென்னை மாநகராட்சி பகுதியில் உள்ள மக்கள் நோய் தொடர்பான தங்கள் சந்தேகங்களை தீர்த்துக்கொள்ள டெலிமெடிசின் சொசைட்டி ஆப் இந்தியா நிறுவனத்தில் பதிவு பெற்ற சிறந்த மருத்துவர்களைக் கொண்டு தொலை மருத்துவ முறை மூலம் தங்கள் மருத்துவ சந்தேகங்களுக்கு தெளிவு பெற தமிழ்நாடு அரசு வழிவகை செய்துள்ளது.

தமிழ்நாட்டில் உள்ள ஒவ்வொரு நபரும் ஒவ்வொரு குடும்பமும் பாதுகாப்பாக இருப்பது தான் மாண்புமிகு அம்மாவின் அரசுக்கு மிகவும் முக்கியமானது. ஆகவே தமிழ்நாடு அரசால் அறிவிக்கப்பட்ட அனைத்து வழிமுறைகளையும் தவறாமல் பின்பற்றி விழித்திருங்கள் விலகி இருங்கள் வீட்டில் இருங்கள் என்ற கோட்பாட்டின் அடிப்படையில் சமூக இடைவெளியை கடைபிடித்து வரும் வைரஸ் நோயை கட்டுப்படுத்த அரசுக்கு முழு ஒத்துழைப்பு நல்க வேண்டும் என்று தமிழ்நாடு மக்கள் ஒவ்வொருவரையும் வேண்டி கேட்டுக்கொள்கிறேன்’’ இவ்வாறு முதல்வர் அறிக்கையில் கூறியிருக்கிறார்.

LEAVE A REPLY

Please enter your comment!
Please enter your name here