டாஸ்மாக் கடைகளை அரசிடமே ஒப்படைக்கபோகிறோம் - டாஸ்மாக் பார் உரிமையாளர்கள் அதிரடி அறிவிப்பு

தமிழ்நாடு டாஸ்மாக் பார் உரிமையாளர்கள் பார் கட்டிட உரிமையாளர்கள் தொழிலாளர் நல சங்க மாநில தலைவர் அன்பரசன், செயலாளர் பாலமுருகன், பொருளாளர் ராமநாதன் ஆகியோர் தூத்துக்குடி கலால் பிரிவு உதவி ஆணையரிடம் மனு அளித்தனர். 

அந்த மனுவில், டாஸ்மாக் நிறுவனம் தொடங்கிய கடந்த 2004ம் ஆண்டு முதல் அரசு அனுமதி பெற்று மதுபான மதுகூடம்  (பார்) நடத்தி வருகிறோம். கடந்த 2020ம் ஆண்டு கொரோனா காலக் கட்டத்தில் இருந்து நாங்கள் பொருளாதார ரீதியான பல கஷ்டங்களை அனுபவித்து வருகிறோம். அன்றிலிருந்து இன்று வரையிலும் மீண்டு வரமுடியாத சூழ்நிலையில் இருக்கிறோம். நாங்கள் மாதம்தோறும் அரசுக்கு ரூ.1,00,000- (ஒரு லட்சம்) முதல் ரூ.3,50,000- (ரூபாய் மூன்று லட்சத்து ஐம்பதாயிரம்) வரை  காசோலையாக செலுத்தி வருகிறோம். அதாவது டாஸ்மாக் கடையில் நடக்கும் மதுபான விற்பனையின் அடிப்படையில் ஊராட்சி பகுதி பார்களுக்கு 1.40 சதவீதம், மாநகராட்சி பகுதி பார்களுக்கு 1.60 சதவீதம் என்ற அடிப்படையில் அரசுக்கு பணம் செலுத்தி பார் நடத்தி வருகிறோம். இதுக்கிடையே கடையில் மதுபானம் வாங்குபவர்களில் 30 சதவீதம் பேர்தான் மதுபான கூடத்தை(பார்) பயன்படுத்துகின்றன்றனர். மற்றவர்கள் மதுவை வாங்கி வெளியே கொண்டு செல்கின்றனர். அதற்கும் சேர்த்து தான் அரசுக்கு நாங்கள் பணம் செலுத்துகிறோம். அனைத்து டாஸ்மாக் கடை அருகிலும் பெட்டிகடைகள் இருக்கின்றன. அது மினி பார் போல் செயல்படுகிறது. பலமுறை இதுகுறித்து அதிகாரிகளிடம் தெரியப்படுத்தியும் இதுநாள் வரை எந்தவொரு நடவடிக்கையும் அவர்கள் மீது எடுத்ததாக தெரியவில்லை. 

டாஸ்மாக் கடைகள் இருக்கும் இடத்திற்கு அரசு மாதம் ரூ.2,500- முதல் ரூ.6,000- வரை வாடகையாக கொடுக்கிறது. ஆனால் நாங்கள் அந்த இடத்திற்கு மதுபான கூட உரிமையாளர் அட்வான்சாக ரூ.2,00,000- முதல் ரூ.5,00,000- வரை கொடுத்து வாடகையாக மாதம் ரூ.1,00,000- முதல் ரூ.1,50,000- வரை செலுத்தி வருகிறோம்.

அரசு ஒப்பந்தத்தில் நிர்ணயித்தபடி ஏற்கனவே டெண்டர்கள் விடப்பட்ட கடைகளில் அரசு நிர்ணயித்த தொகையினை பார்கள் ஏலம் எடுத்து அரசு சட்டத்திட்டங்களுக்குட்பட்டு கடை நடத்தி வருகிறோம். ஆனால் தற்போது சில தனிநபர்கள் எந்தவொரு சட்டத்திற்குட்படாமல் வியாபாரம் செய்து வருகின்றனர். அவர்களை உட்கோட்ட அதிகாரிகள் கண்டுகொள்வதில்லை.

திரேஸ்புரம், லூர்தம்மாள்புரம், கரிக்களம் காலனி, மீன்பிடித் துறைமுகம் போன்ற இடங்களில் தனி நபர்கள் மூலம் எப்போதும் தங்கு தடையின்றி மதுபானங்கள் விற்கப்படுகின்றன. அங்கு மதுவிற்கும் தனிநபர்களை அதிகாரிகள் கண்டுகொள்வதில்லை. மதுபாட்டில் விற்பதில் அவர்களுக்குள் கோஷ்டி பூசல் ஏற்பட்டு அடிதடி தகராறு கூட நடந்திருக்கிறது. அவர்கள் மீது காவல் நிலையத்தில் பெயர் அளவில் மட்டுமே வழக்கு பதிவு செய்யப்படுகிறது.

ஆனால் மதுபானகூடம் (பார்) நடத்தி வரும் உரிமையாளர்கள் மீது அதிகாரிகள் வழக்கு பதிவு செய்து அரசுக்கு வருவாய் இழப்பு செய்து வருகின்றனர். இதனால் மதுபானகூட உரிமையாளர்கள் மிகுந்த மன உளைச்சலுக்கு ஆளாகி வருகிறோம். இப்படியே சென்றால் மதுபானகூட உரிமையாளர்கள் தொடர்ந்து மதுகூடம் நடத்த முடியாத சூழ்நிலைக்கு ஆளாகி விடுவார்கள். மேலும், காவல் நிலையங்களில் உயர் அதிகாரிகளின் அழுத்தத்தின் பேரில் புள்ளிவிவர கணக்கிற்காக வழக்கு பதிவு செய்வதற்கு எங்களிடமே ஆட்கள் கேட்கிறார்கள். அரசு விதிகளின்படி உரிய உரிமம் பெற்று அரசுக்கு உரிய நிர்ணயத் தொகையை செலுத்தி மதுகூடம் (பார்) நடத்தும் உரிமையாளர்களை பொய் வழக்கு பதிவு செய்து கைது செய்ய எத்தனித்து வருகிறார்கள். மேற்கண்ட அனைத்து சீர்குலைவையும் சரிசெய்திட கோரி, 18-12-2024 தூத்துக்குடி மாநகரம் மற்றும் புறநகரத்திலுள்ள அனைத்து மதுபானகூடங்கள் (பார்) ஒருநாள் மட்டும் கடைஅடைப்பு செய்தோம் தற்போது 10 ம் தேதி முதல் பார்கள் அடைக்கப்பட்டுள்ளது. வரும் 28ம் தேதி மாவட்டத்திலுள்ள அனைத்து கடைகளும் அரசிடம் ஓப்படைக்கும் போராட்டம் நடத்த முடிவு செய்துள்ளோம். உரிய பரிகாரம் வழங்கிட இதன் மூலம் துறை அதிகாரிகளையும் காவல்துறையையும் இதன் மூலம் கேட்டுக் கொள்கிறோம் என்று கூறப்பட்டிருந்தது.