இந்திய, தமிழக தொன்மை வரலாற்றை அறிய அரிய வாய்ப்பு - தூத்துக்குடியில் தமிழ்க் கல்வெட்டுகள் புகைப்படக் கண்காட்சி

தூத்துக்குடி, செப். 22:

தமிழகத்தின் தொன்மையான வரலாறு, பண்பாடு, அரசியல், சமூக வாழ்க்கை உள்ளிட்ட பல்வேறு வரலாற்றுத் தகவல்களை அறிந்து கொள்ளும் வகையில், தூத்துக்குடி காமராஜ் கல்லூரியில் தமிழ்க் கல்வெட்டுகள் குறித்த புகைப்படக் கண்காட்சி இன்று தொடங்கியது.

இந்தியத் தொல்லியல் ஆய்வுத்துறையின் கல்வெட்டுப் பிரிவு, சென்னை மற்றும் தூத்துக்குடி காமராஜ் கல்லூரி வரலாற்றுத்துறை சார்பில் ஏற்பாடு செய்யப்பட்டுள்ள இக்கண்காட்சியை, உதவி ஆட்சியர் பயிற்சி பாட்டீல் கிருஷ்ணா பபுருவான் தொடங்கி வைத்து பார்வையிட்டார்.

கண்காட்சியில் தமிழகத்தின் பல்வேறு பகுதிகளில் காணப்படும் தொன்மையான கல்வெட்டுகளின் புகைப்படங்கள் இடம்பெற்றுள்ளன. இக்கல்வெட்டுகள் வாயிலாக அக்கால மக்களின் ஆட்சி நிர்வாகம், அரசியல் நிலவரம், சமூக அமைப்பு, பொருளாதாரம், வணிகம், நிலம் மற்றும் நீர்ப்பாசன மேலாண்மை, கோயில் நிர்வாகம், சமயம், கலை மற்றும் பண்பாடு உள்ளிட்ட பல்வேறு அம்சங்களை அறிந்து கொள்ள முடியும்.

குறிப்பாக, மன்னர்கள் மற்றும் அரசர்களின் ஆட்சிக் காலத்தில் வெளியிடப்பட்ட கல்வெட்டுகள், நிலதானங்கள், கோயில்களுக்கு வழங்கப்பட்ட கொடைகள், வரி வசூல், ஊர் நிர்வாகம், வணிக நடவடிக்கைகள் உள்ளிட்ட அன்றாட நிர்வாகம் மற்றும் சமூக வாழ்க்கை தொடர்பான முக்கியமான வரலாற்றுச் செய்திகளைப் பதிவு செய்துள்ளன.

வரலாற்று நூல்கள் மட்டுமின்றி, கல்வெட்டுகள் உள்ளிட்ட தொல்லியல் ஆதாரங்களும் ஒரு காலகட்டத்தின் உண்மை நிலவரத்தை அறிந்து கொள்வதற்கான முக்கிய ஆதாரங்களாக விளங்குகின்றன. கல், செப்பேடு உள்ளிட்டவற்றில் பொறிக்கப்பட்டுள்ள எழுத்துகள் மற்றும் தகவல்களை ஆய்வு செய்வதன் மூலம், பழங்காலத் தமிழகத்தின் பல்வேறு வரலாற்றுக் கூறுகளை ஆராய்ச்சியாளர்கள் அறிந்து வருகின்றனர்.

கண்காட்சியின் தொடக்க நிகழ்ச்சியில், இந்தியத் தொல்லியல் ஆய்வுத்துறையின் கல்வெட்டுப் பிரிவு, சென்னை அலுவலகத் தலைவர் ஏசுபாபு, உதவி கல்வெட்டாய்வாளர்கள் பி.டி. நாகராஜன், வீரமணிகண்டன் ஆகியோர் கலந்து கொண்டு, கல்வெட்டுகளை எவ்வாறு வாசிப்பது, அவற்றில் இடம்பெற்றுள்ள வரலாற்றுச் செய்திகள் என்ன, அவற்றின் தொல்லியல் முக்கியத்துவம் என்ன என்பது குறித்து மாணவர்கள் மற்றும் பார்வையாளர்களுக்கு விளக்கினர்.

காமராஜ் கல்லூரி முதல்வர் பானுமதி, வரலாற்றுத்துறைத் தலைவர் தேவராஜ், பேராசிரியர் சுப்ரமணியன் உள்ளிட்ட கல்லூரி பேராசிரியர்கள், மாணவர்கள் மற்றும் பலர் நிகழ்ச்சியில் கலந்து கொண்டனர்.

பாடப்புத்தகங்களில் படிக்கும் வரலாற்றுச் செய்திகளுக்கு அப்பால், அவற்றுக்கான தொல்லியல் ஆதாரங்களை நேரடியாகப் புகைப்படங்கள் மூலம் பார்வையிடும் வாய்ப்பை இக்கண்காட்சி வழங்குகிறது. குறிப்பாக வரலாறு, தொல்லியல், தமிழ், பண்பாடு உள்ளிட்ட துறைகளில் ஆர்வம் கொண்ட மாணவர்கள் மற்றும் ஆராய்ச்சியாளர்களுக்கு இக்கண்காட்சி பயனுள்ளதாக இருக்கும்.

தமிழகத்தின் வரலாறு மட்டுமின்றி, இந்தியத் தொன்மை வரலாற்றை புரிந்து கொள்வதற்கும் கல்வெட்டுகள் முக்கிய பங்காற்றுவதால், இக்கண்காட்சி பொதுமக்களிடையே வரலாற்று விழிப்புணர்வை ஏற்படுத்தும் வகையிலும் அமைந்துள்ளது.

கண்காட்சி செப்டம்பர் 22 முதல் 24-ஆம் தேதி வரை தினமும் காலை 10 மணி முதல் மாலை 4 மணி வரை காமராஜ் கல்லூரியில் நடைபெறுகிறது. மாணவர்கள், ஆசிரியர்கள், ஆராய்ச்சியாளர்கள் மற்றும் பொதுமக்கள் அனைவரும் இலவசமாகக் கண்காட்சியை பார்வையிடலாம்.