தமிழ்நாடு மின் பகிர்மான கழகத்தில் 8000 கள உதவியாளர் பணியிடங்கள்

தமிழ்நாடு மின் பகிர்மானக் கழகத்தில் 8,000 கள உதவியாளர் பணியிடங்கள்! 2027, 2028ஆம் ஆண்டுகளில் நிரப்ப அரசு அனுமதி

சென்னை: தமிழ்நாடு மின் பகிர்மானக் கழகத்தில் 8,000 கள உதவியாளர் (Field Assistant) பணியிடங்களை நேரடி நியமனம் மூலம் நிரப்புவதற்கு தமிழ்நாடு அரசு அனுமதி வழங்கியுள்ளது. இதன்படி, 2027ஆம் ஆண்டில் 5,000 பணியிடங்களும், 2028ஆம் ஆண்டில் 3,000 பணியிடங்களும் என இரண்டு கட்டங்களாகப் பணியிடங்கள் நிரப்பப்பட உள்ளன.

இதுதொடர்பாக எரிசக்தித் துறை சார்பில் அரசாணை வெளியிடப்பட்டுள்ளது. அதில், தமிழ்நாடு மின் பகிர்மானக் கழகத்தின் சார்பில் முன்வைக்கப்பட்ட கோரிக்கையைப் பரிசீலித்து, மொத்தம் 8,000 பணியிடங்களை நிரப்ப அரசு அனுமதி வழங்கியுள்ளதாகத் தெரிவிக்கப்பட்டுள்ளது.

இரண்டு கட்டங்களாக நியமனம்

அரசாணையின்படி, முதல் கட்டமாக 2027ஆம் ஆண்டில் 5,000 கள உதவியாளர் பணியிடங்களும், இரண்டாம் கட்டமாக 2028ஆம் ஆண்டில் 3,000 பணியிடங்களும் நிரப்பப்பட உள்ளன. இந்த நேரடி நியமனங்கள் தமிழ்நாடு அரசுப் பணியாளர் தேர்வாணையம் (TNPSC) மூலம் மேற்கொள்ளப்பட உள்ளன.

ஊதிய விவரம்

அரசாணையில் குறிப்பிடப்பட்டுள்ள ஊதிய விகிதம் ரூ.18,800 முதல் ரூ.59,900 வரை உள்ளது. அகவிலைப்படி உள்ளிட்ட இதர படிகள் மற்றும் பங்களிப்புகள் தொடர்பான கணக்கீடுகளும் அரசாணையில் இடம்பெற்றுள்ளன.

வேலைவாய்ப்பை எதிர்பார்ப்பவர்கள் கவனத்திற்கு

8,000 பணியிடங்களை நிரப்புவதற்கான அனுமதி வழங்கப்பட்டுள்ளதால், மின் பகிர்மானக் கழகத்தில் வேலைவாய்ப்பை எதிர்பார்க்கும் இளைஞர்கள் இந்த அறிவிப்பைக் கவனத்தில் கொள்ளலாம்.

எனினும், விண்ணப்பம் தொடங்கும் தேதி, கல்வித் தகுதி, வயது வரம்பு, தேர்வு முறை, இடஒதுக்கீடு மற்றும் விண்ணப்பக் கட்டணம் குறித்த விவரங்கள் இந்த அரசாணையில் குறிப்பிடப்படவில்லை. இதற்கான முழுமையான விவரங்கள் தமிழ்நாடு அரசுப் பணியாளர் தேர்வாணையத்தின் அதிகாரப்பூர்வ வேலைவாய்ப்பு அறிவிப்பு வெளியான பின்னரே உறுதியாகத் தெரியவரும்.

குறிப்பு: 8,000 பணியிடங்களை நிரப்புவதற்கு அரசு அனுமதி வழங்கியிருப்பது தொடர்பான அரசாணை இதுவாகும். இதனை விண்ணப்பங்கள் வரவேற்கப்பட்டுள்ள வேலைவாய்ப்பு அறிவிப்பாகக் கருதக்கூடாது.