குலசேகரபட்டினம் தசரா திருவிழா: பலத்த பாதுகாப்பு; போக்குவரத்தில் மாற்றம்!

தூத்துக்குடி மாவட்டம், குலசேகரபட்டினம் அருள்மிகு முத்தாரம்மன் திருக்கோவில் தசரா திருவிழாவின் முக்கிய நிகழ்வான சூரசம்ஹாரம் நாளை (அக்டோபர் 20) நள்ளிரவு 12 மணிக்கு நடைபெற உள்ளது. இதையொட்டி, லட்சக்கணக்கான பக்தர்கள் திரளுவார்கள் என எதிர்பார்க்கப்படுவதால், பக்தர்களின் பாதுகாப்பு மற்றும் போக்குவரத்து நெரிசலைக் கட்டுப்படுத்த தூத்துக்குடி மாவட்ட காவல்துறை விரிவான ஏற்பாடுகளைச் செய்துள்ளது.

கடந்த அக்டோபர் 11-ஆம் தேதி கொடியேற்றத்துடன் தொடங்கிய இத்திருவிழா, அக்டோபர் 21-ஆம் தேதி மாலை கொடியிறக்கம் மற்றும் காப்பு களைதல் நிகழ்ச்சிகளுடன் நிறைவடைகிறது. விழாவின் முக்கிய நாட்களான அக்டோபர் 19, 20, 21 ஆகிய தேதிகளில் பாதுகாப்பு மற்றும் போக்குவரத்துக் கட்டுப்பாடுகள் தீவிரமாக அமல்படுத்தப்படுகின்றன.

பக்தர்களுக்குப் பல்வேறு கட்டுப்பாடுகள்

கோவிலுக்கு வரும் பக்தர்கள் வேல், சூலாயுதம், வாள் உள்ளிட்ட உலோகப் பொருட்களைக் கொண்டு வரத் தடை விதிக்கப்பட்டுள்ளது. அதேநேரத்தில், கடவுள் படங்களை எடுத்துவரவும், பக்திப் பாடல்களை இசைக்கவும், கடவுள் படங்கள் பொறித்த ஆடைகளை அணியவும் தடையில்லை எனக் காவல்துறை தெரிவித்துள்ளது.

ஜாதி அடையாளங்கள் கொண்ட கொடிகள், தொப்பிகள், ரிப்பன்கள் மற்றும் ஜாதி அடிப்படையிலான ஆடைகளைப் பயன்படுத்தக் கூடாது. காவல்துறையினரைப் போன்று சீருடை அணிந்து வேடமிடுவதற்கும் அனுமதி இல்லை. ஆபாசமான நடனம், நடத்தை, அதிக ஒலியுடன் இசைக்கருவிகளை இசைத்தல், ஜாதி தொடர்பான கோஷங்கள் எழுப்புதல் ஆகியவற்றுக்கும் தடை விதிக்கப்பட்டுள்ளது.

காவல்துறையின் முன் அனுமதியின்றி ஒலிபெருக்கிகளைப் பயன்படுத்தவோ, ஆபாசமான ஆடல், பாடல் நிகழ்ச்சிகளை நடத்தவோ கூடாது. தசரா குழுவினர் முக்கியச் சந்திப்புகளில் நீண்ட நேரம் நின்று வாணவேடிக்கை நடத்துதல், நன்கொடை வசூலித்தல், இசைக்கருவிகளை இசைத்து போக்குவரத்துக்கு இடையூறு ஏற்படுத்துதல் ஆகியவற்றைத் தவிர்க்க வேண்டும். விதிமுறைகளை மீறுவோர் மீது சட்டப்படி நடவடிக்கை எடுக்கப்படும் என எச்சரிக்கப்பட்டுள்ளது.

வாகன நிறுத்துமிடங்கள் – சாலையோர நிறுத்தத்துக்குத் தடை

திருவிழாவுக்கு வரும் பக்தர்களின் வாகனங்களை நிறுத்துவதற்காக 21 இடங்களில் ஏற்பாடுகள் செய்யப்பட்டுள்ளதாக காவல்துறை அறிவிப்பில் தெரிவிக்கப்பட்டுள்ளது. இதில் 1 முதல் 13 வரையிலான வாகன நிறுத்துமிடங்கள் தருவைகுளம் சுற்றுவட்டாரத்திலும், 14, 15 ஆகிய இடங்கள் மாற்று அணுகுவழியிலும், 16 முதல் 21 வரையிலான இடங்கள் மணப்பாடு சாலைப் பகுதியிலும் அமைந்துள்ளன.

வாகனங்களைச் சாலையிலோ சாலையோரங்களிலோ நிறுத்தக் கூடாது. ஒதுக்கப்பட்ட இடங்களில் காவல்துறையினர் வழிகாட்டும் வகையில் வரிசையாக நிறுத்த வேண்டும். வாகனங்களைச் சுற்றிக் கொட்டகை அமைக்கவும் அனுமதியில்லை. மழை காரணமாக மாற்று ஏற்பாடுகள் செய்யப்பட்டால், அதற்கு பக்தர்கள் ஒத்துழைக்க வேண்டும்.

திறந்த வாகனங்களில் பாதுகாப்பற்ற முறையில் பக்தர்களை ஏற்றிவரத் தடை விதிக்கப்பட்டுள்ளது. உரிய அனுமதியின்றி சாலையோரங்களில் கடைகள் அமைத்து போக்குவரத்துக்கு இடையூறு ஏற்படுத்துவோர் மீதும் நடவடிக்கை எடுக்கப்படும்.

சரக்கு வாகனங்களுக்குக் கட்டுப்பாடு

அக்டோபர் 19, 20, 21 ஆகிய தேதிகளில் அத்தியாவசியப் பொருட்களை ஏற்றிச் செல்லும் வாகனங்களைத் தவிர, குறிப்பிட்ட வழித்தடங்களில் இலகுரக மற்றும் கனரக சரக்கு வாகனங்கள் செல்லத் தடை விதிக்கப்பட்டுள்ளது. திருச்செந்தூர் – குலசேகரபட்டினம் – மணப்பாடு, பெரியதாழை, உவரி வழித்தடங்கள், தெற்குப் பகுதிகளிலிருந்து திருச்செந்தூர் செல்லும் வழித்தடங்கள் மற்றும் பரமன்குறிச்சி வழியாக உடன்குடி செல்லும் பாதைகளில் இந்தக் கட்டுப்பாடுகள் அமலில் இருக்கும்.

தூத்துக்குடி, திருநெல்வேலி, சாத்தான்குளம், மெஞ்ஞானபுரம், திசையன்விளை உள்ளிட்ட பகுதிகளிலிருந்து திருச்செந்தூர் மற்றும் உடன்குடி நோக்கிச் செல்லும் சரக்கு வாகன ஓட்டிகள், பயணத்திற்கு முன்பாக காவல்துறை அறிவித்துள்ள மாற்று வழித்தடங்களைத் தெரிந்துகொண்டு செல்ல வேண்டும்.

தனியார் வாகனங்களுக்கு மாற்றுப் பாதைகள்

தூத்துக்குடியிலிருந்து திருச்செந்தூர் வழியாக குலசேகரபட்டினத்தைக் கடந்து கன்னியாகுமரி செல்லும், திருவிழாவுக்கு வராத வாகனங்கள் மாற்றுப் பாதையில் செல்ல அறிவுறுத்தப்பட்டுள்ளன. தூத்துக்குடியிலிருந்து கன்னியாகுமரி செல்லும் வாகனங்கள் திருநெல்வேலி வழியாகச் செல்லலாம்.

திருச்செந்தூர் வழியாகச் செல்ல முடியாத வாகனங்கள் பரமன்குறிச்சி, மெஞ்ஞானபுரம், சாத்தான்குளம், மணிநகர் வழியாகவும் அல்லது திசையன்விளை வழியாகவும் பயணிக்க ஏற்பாடு செய்யப்பட்டுள்ளது. கன்னியாகுமரி, உவரி, பெரியதாழை, மணப்பாடு பகுதிகளிலிருந்து திருச்செந்தூர் வருவோர் காவல்துறை அறிவித்துள்ள மாற்றுப் பாதைகளைப் பயன்படுத்த வேண்டும்.

தூத்துக்குடி, திருநெல்வேலி, மெஞ்ஞானபுரம், சாத்தான்குளம், திசையன்விளை மற்றும் கன்னியாகுமரி மார்க்கங்களில் இருந்து வரும் தனியார் வாகனங்கள் குறிப்பிட்ட அணுகுவழிகள் வழியாக ஒதுக்கப்பட்ட வாகன நிறுத்துமிடங்களுக்குச் செல்ல வேண்டும். திருவிழா முடிந்து திரும்பும்போதும், நுழைந்து வந்த அதே பாதையில் செல்ல அனுமதி கிடைக்கும் எனக் கருதாமல், காவல்துறையினர் அறிவுறுத்தும் வெளியேறும் வழித்தடங்களைப் பின்பற்ற வேண்டும்.

திருச்செந்தூர், உடன்குடி மற்றும் ஆத்தூர் பகுதிகளில் போக்குவரத்து நெரிசல் ஏற்பட்டால் கூடுதல் மாற்றுப் பாதைகள் நடைமுறைப்படுத்தப்படும். எனவே, வாகன ஓட்டிகள் போக்குவரத்துக் காவலர்களின் அறிவுறுத்தல்களைப் பின்பற்ற வேண்டும்.

அரசு சிறப்புப் பேருந்துகளுக்குத் தற்காலிக நிலையங்கள்

திருநெல்வேலி மற்றும் தூத்துக்குடி மார்க்கத்திலிருந்து வரும் அரசு சிறப்புப் பேருந்துகள், திருச்செந்தூர் வழியாக குலசேகரபட்டினம் வடக்கூரில் உள்ள அறம்வளர்த்த நாயகியம்மன் கோவில் அருகிலுள்ள தற்காலிகப் பேருந்து நிலையத்தில் நிறுத்தப்படும்.

திசையன்விளை, தட்டார்மடம், சாத்தான்குளம், மெஞ்ஞானபுரம் வழியாக வரும் சிறப்புப் பேருந்துகள் தருவைகுளம் அருகிலுள்ள கொட்டங்காடு சாலைச் சந்திப்பில் அமைக்கப்பட்டுள்ள தற்காலிகப் பேருந்து நிலையத்தைப் பயன்படுத்தும். கன்னியாகுமரி, உவரி, பெரியதாழை, மணப்பாடு வழியாக வரும் பேருந்துகள் குலசேகரபட்டினம் தெற்குப் பகுதியில் தீதத்தாபுரம் சந்திப்பு அருகிலுள்ள தற்காலிகப் பேருந்து நிலையத்தில் நிறுத்தப்படும்.

பேருந்துகளில் வரும் பக்தர்கள் அந்தந்த நிலையங்களிலிருந்து காவல்துறை அறிவித்துள்ள நடைபாதைகள் வழியாகக் கோவிலுக்கும் கடற்கரைப் பகுதிக்கும் செல்ல வேண்டும். திருவிழாவை முன்னிட்டு அக்டோபர் 19 முதல் 21 வரை சிறப்புப் பேருந்துகள் இயக்கப்படுவதாகவும் அறிவிக்கப்பட்டுள்ளது.

கோவில் மற்றும் கடற்கரைக்குச் செல்ல தனித்தனி வழிகள்

தசரா குழுவினர், கோவிலுக்கு வரும் பக்தர்கள், தீச்சட்டி எடுத்து வரும் பக்தர்கள் மற்றும் கடற்கரைக்குச் செல்பவர்கள் குறிப்பிட்ட வழித்தடங்களைப் பின்பற்ற வேண்டும். கோவிலுக்குள் செல்லும் வழியும், தரிசனம் முடித்துவிட்டு வெளியேறும் வழியும் தனித்தனியாக அமைக்கப்பட்டுள்ளன.

கோவில் தரிசனம் முடித்தவர்கள் மேற்கு வாசல் வழியாக வெளியேறி காவல் நிலையம் மற்றும் சகாயம் பெட்ரோல் நிலையம் வழியாக உடன்குடி பைபாஸ் சந்திப்பை அடைய வேண்டும். கடற்கரையிலிருந்து வெளியேறும் பக்தர்கள் சிதம்பரேஸ்வரர் கோவில், ரைஸ்மில் சந்திப்பு, கச்சேரித் தெரு வழியாக வெளியேற அறிவுறுத்தப்பட்டுள்ளனர். தெற்குப் பகுதிக்குச் செல்பவர்களுக்கு மாற்று வழியும் ஏற்பாடு செய்யப்பட்டுள்ளது.

காணாமல் போகும் குழந்தைகளுக்கு உதவி மையங்கள்

கூட்ட நெரிசலில் குழந்தைகள் அல்லது நபர்கள் காணாமல் போனால் உடனடியாக அருகிலுள்ள காவல் உதவி மையத்திலோ, ‘May I Help You’ மையத்திலோ தகவல் தெரிவிக்கலாம். குழந்தைகளுக்கான அடையாள அட்டைகள் வழங்கவும் ஏற்பாடுகள் செய்யப்பட்டுள்ளன. எனவே, பெற்றோர்களும் தசரா குழுக்களின் பொறுப்பாளர்களும் குழந்தைகளின் பாதுகாப்பில் கூடுதல் கவனம் செலுத்த வேண்டும்.

நவீன தொழில்நுட்பத்தில் தீவிர கண்காணிப்பு

திருவிழாவை முன்னிட்டு 10 கண்காணிப்பு கோபுரங்கள், சுமார் 50 காவல் உதவி மையங்கள், 7 நகரும் சிசிடிவி கேமரா வாகனங்கள், 300-க்கும் மேற்பட்ட நிலையான கண்காணிப்பு கேமராக்கள், 3 முக்கியச் சாலைகளில் தானியங்கி வாகனப் பதிவு எண் கண்டறியும் (ANPR) கேமராக்கள் ஆகியவற்றின் மூலம் கண்காணிக்க ஏற்பாடு செய்யப்பட்டுள்ளது.

மேலும், 5 ட்ரோன் கேமராக்கள் மூலம் வான்வழிக் கண்காணிப்பும், 5 முக அடையாளக் கண்காணிப்பு கேமராக்கள் மூலம் கண்காணிப்பும் மேற்கொள்ளப்பட உள்ளன. ஆயிரத்திற்கும் மேற்பட்ட குற்றவாளிகளின் புகைப்படங்கள் பதிவேற்றம் செய்யப்பட்டுள்ளதாகவும் காவல்துறை தெரிவித்துள்ளது. குலசேகரபட்டினம் காவல் நிலையத்தில் அமைக்கப்பட்டுள்ள கண்காணிப்புத் திரைகள் வாயிலாக 24 மணி நேரமும் சுழற்சி முறையில் கண்காணிப்புப் பணி நடைபெறும்.

வாகனங்கள் வரும் வழிகள், வாகன நிறுத்துமிடங்கள், கோவில் வளாகம், கடற்கரை, பக்தர்கள் செல்லும் மற்றும் வெளியேறும் பாதைகள் என முக்கிய இடங்களில் சீருடை மற்றும் சாதாரண உடையில் காவலர்கள் பாதுகாப்புப் பணியில் ஈடுபடுத்தப்பட உள்ளனர்.

தசரா திருவிழாவை பக்தர்கள் மகிழ்ச்சியாகவும், பாதுகாப்பாகவும் கொண்டாடும் வகையில் மாவட்ட நிர்வாகம் மற்றும் காவல்துறை மேற்கொண்டுள்ள ஏற்பாடுகளுக்கு அனைவரும் முழு ஒத்துழைப்பு அளிக்க வேண்டும் எனத் தூத்துக்குடி மாவட்ட காவல்துறை கேட்டுக்கொண்டுள்ளது.