திருச்செந்தூரில் அசுரனை வதம் செய்தார் முருகப்பெருமான் - பக்தர்களின் நம்பிக்கையைப் பெற அக்கறை காட்டிய அரசு நிர்வாகம்

Thiruchendur Murugan

திருச்செந்தூரில் அசுரனை வதம் செய்தார் முருகப்பெருமான் -  பக்தர்களின் நம்பிக்கையைப் பெற அக்கறை காட்டிய அரசு நிர்வாகம்

லட்சக்கணக்கான பக்தர்கள் மத்தியில் அசுரனை வதம் செய்தார் முருகப்பெருமான்! பக்தர்களின் நம்பிக்கையைப் பெற அக்கறை காட்டிய அரசு நிர்வாகம் – பாராட்டுகளுக்கு மத்தியில் சில குறைபாடுகள்; அடுத்த ஆண்டு திருத்தப்படுமா?

திருச்செந்தூர் அருள்மிகு சுப்பிரமணிய சுவாமி திருக்கோயிலில் நேற்று (நவம்பர் 15) நடைபெற்ற கந்த சஷ்டி திருவிழாவின் சிகர நிகழ்ச்சியான சூரசம்ஹாரத்தைக் காண பல லட்சம் பக்தர்கள் குவிந்தனர். கடற்கரையில் கடல் அலைகளுடன் போட்டி போடும் வகையில் மக்கள் வெள்ளம் திரண்டிருந்தது. ஆணவம், அநீதி, தீமை ஆகியவற்றின் அடையாளமாக விளங்கிய சூரபத்மனை முருகப்பெருமான் தனது வேலால் வதம் செய்த ஆன்மிக நிகழ்வு பக்தர்களை பரவசத்தில் ஆழ்த்தியது.

திருச்செந்தூர் முருகன் கோயிலில் வைகாசி விசாகம், கந்த சஷ்டி உள்ளிட்ட பல்வேறு விழாக்கள் ஆண்டு முழுவதும் சிறப்பாக நடைபெறுகின்றன. குறிப்பாக ஐப்பசி மாதத்தில் நடைபெறும் கந்த சஷ்டி விரதமும், அதன் நிறைவில் நடைபெறும் சூரசம்ஹாரமும் உலகப் புகழ்பெற்றவை. இந்த நிகழ்வை நேரில் தரிசிப்பது வாழ்வில் கிடைக்கும் அரிய பேறு என்று கருதும் பக்தர்கள் தமிழகத்தின் பல்வேறு பகுதிகளில் இருந்தும், வெளிமாநிலங்கள் மற்றும் வெளிநாடுகளில் இருந்தும் திருச்செந்தூருக்கு வருகை தருகின்றனர்.

அந்த வகையில் இந்த ஆண்டு நவம்பர் 10ஆம் தேதி தொடங்கிய கந்த சஷ்டி விழாவின் முக்கிய நிகழ்ச்சியான சூரசம்ஹாரம் நேற்று மாலை நடைபெற்றது. மாலை 4 மணியளவில் தொடங்கிய நிகழ்ச்சியில், பல்வேறு உருவங்களில் தோன்றி ஆணவத்துடன் போரிட்ட சூரபத்மனை முருகப்பெருமான் தனது வேலால் சம்ஹாரம் செய்தார். அப்போது கடற்கரையில் திரண்டிருந்த பக்தர்கள் அரோகரா கோஷம் எழுப்பி முருகப்பெருமானை வழிபட்டனர்.

பக்தர்களுக்காக விரிவான ஏற்பாடுகள்

இந்த ஆண்டு பக்தர்கள் கூட்டம் மிக அதிகமாக இருக்கும் என்பதை முன்கூட்டியே கணித்து மாவட்ட நிர்வாகம், காவல்துறை மற்றும் இந்து சமய அறநிலையத்துறை சார்பில் பல்வேறு ஏற்பாடுகள் செய்யப்பட்டிருந்தன. பக்தர்கள் தங்குவதற்கான தற்காலிகக் கொட்டகைகள், குடிநீர், கழிப்பறைகள், அன்னதானம், மருத்துவ வசதிகள், வாகன நிறுத்துமிடங்கள் உள்ளிட்ட அடிப்படை வசதிகள் ஏற்படுத்தப்பட்டிருந்தன.

பக்தர்களின் போக்குவரத்து வசதிக்காக பல்வேறு ஊர்களில் இருந்து சிறப்புப் பேருந்துகள் இயக்கப்பட்டன. பேருந்து நிலையம் மற்றும் ரயில் நிலையங்களில் இருந்து கோயில் பகுதிக்கு வந்து செல்ல இலவச சுற்றுப் பேருந்துகளும் இயக்கப்பட்டன. 300-க்கும் மேற்பட்ட சிறப்புப் பேருந்துகள், சிறப்பு ரயில்கள் உள்ளிட்ட போக்குவரத்து வசதிகள் செய்யப்பட்டிருந்தன. பாதுகாப்புப் பணியில் 4,200-க்கும் மேற்பட்ட காவலர்கள் ஈடுபடுத்தப்பட்டிருந்தனர்.

மேலும், 493 கண்காணிப்பு கேமராக்கள், பல்வேறு இடங்களில் கண்காணிப்புக் கோபுரங்கள், அவசர மருத்துவ உதவி, ஆம்புலன்ஸ் வசதி உள்ளிட்ட பாதுகாப்பு ஏற்பாடுகளும் செய்யப்பட்டிருந்தன. கடற்கரையில் நேரடியாக நிகழ்ச்சியைக் காண முடியாத பக்தர்களுக்காக 26 இடங்களில் பெரிய அளவிலான எல்.இ.டி. திரைகள் அமைக்கப்பட்டிருந்தன.

பாஸ் இல்லாத நடைமுறை நல்லது; ஆனால் ஏற்பட்ட சிக்கல்கள்!

இந்த ஆண்டு சூரசம்ஹார நிகழ்ச்சியைக் காண்பதற்கு விஐபி உள்ளிட்ட எவருக்கும் தனிப்பட்ட பாஸ் வழங்கப்படாத நடைமுறை வரவேற்கத்தக்கது. அனைவரும் முருகப்பெருமானின் பக்தர்கள் என்ற சமத்துவ உணர்வை வெளிப்படுத்தும் வகையில் இந்த ஏற்பாடு அமைந்திருந்தது.

அதேநேரத்தில், நிகழ்ச்சியை நடத்தும் பொறுப்பாளர்கள், ஒருங்கிணைப்பாளர்கள், ஊடகப் பிரதிநிதிகள் உள்ளிட்டோருக்கான அடையாளம் காணும் நடைமுறை தெளிவாக இல்லாததால் சில இடங்களில் காவல்துறையினருக்கும் நிகழ்ச்சி ஏற்பாட்டாளர்களுக்கும் இடையே வாக்குவாதம் மற்றும் தள்ளுமுள்ளு ஏற்பட்டது. இதனால் செய்தி சேகரிக்கச் சென்ற பத்திரிகையாளர்களும் உரிய இடங்களுக்குச் செல்ல முடியாமல் சிரமத்திற்கு உள்ளாகினர்.

பாஸ் நடைமுறையைத் தவிர்ப்பது நல்ல முடிவாக இருந்தாலும், நிகழ்ச்சியை நடத்துவதற்குத் தேவையான அதிகாரப்பூர்வப் பணியாளர்கள் மற்றும் செய்தி சேகரிக்கும் பத்திரிகையாளர்களை அடையாளம் காண்பதற்குத் தனியான அங்கீகார அட்டை அல்லது தெளிவான அனுமதி நடைமுறை அவசியம் என்பதை இந்த நிகழ்வு உணர்த்தியுள்ளது.

டிஜிட்டல் திரைகளில் ஏற்பட்ட தடுமாற்றம்!

நேரடியாக சூரசம்ஹார நிகழ்ச்சியைப் பார்க்க முடியாத பக்தர்களுக்காக அமைக்கப்பட்டிருந்த டிஜிட்டல் திரைகள் நல்ல ஏற்பாடாக இருந்தன. ஆனால், சில திரைகளில் நிகழ்ச்சியின் ஒளிபரப்பு அவ்வப்போது துண்டிக்கப்பட்டதால் பக்தர்கள் ஏமாற்றமடைந்தனர். அதேபோல் சில இடங்களில் டிஜிட்டல் திரைகளுக்கு முன்னால் வாகனங்கள் நிறுத்தப்பட்டிருந்ததால், திரைகளில் நிகழ்ச்சியைக் காண முடியாத நிலையும் ஏற்பட்டது.

இத்தகைய பெரிய நிகழ்வுகளில் டிஜிட்டல் திரைகள் அமைப்பதோடு மட்டும் நின்றுவிடாமல், அவற்றின் மின்சாரம், ஒளிபரப்பு மற்றும் சுற்றுப்புற இடவசதி ஆகியவற்றையும் தொடர்ந்து கண்காணிக்க வேண்டியது அவசியம்.

வர்ணனையா? பக்திப் பாடல்களா?

சூரசம்ஹார நிகழ்ச்சியின் ஒவ்வொரு கட்டத்தையும் பக்தர்களுக்கு விளக்கிக் கூறும் வகையில் பேராசிரியர் ஞானசம்பந்தம் மைக்கில் வர்ணனை செய்தார். கிராமியப் பாடகர் புஷ்பவனம் குப்புசாமி, அவரது மனைவி மற்றும் குழுவினர் முருகன் பக்திப் பாடல்களைப் பாடினர்.

ஆனால், முருகப்பெருமான் சூரனை வதம் செய்யும் முக்கியமான தருணத்தில் அந்த நிகழ்வின் பின்னணியையும், ஒவ்வொரு கட்டத்தையும் விளக்கும் வர்ணனைக்கு முக்கியத்துவம் அளித்திருக்கலாம் என்ற கருத்தை மூத்த பக்தர்கள் சிலர் தெரிவித்தனர். பக்திப் பாடல்கள் நிகழ்ச்சிக்கு மேலும் பக்தி உணர்வை ஏற்படுத்தினாலும், சூரசம்ஹாரத்தின் முக்கியத் தருணங்களில் நிகழ்வுக்கு ஏற்ற வர்ணனை இடம்பெறுவது பக்தர்களுக்கு அதன் ஆன்மிகப் பொருளை முழுமையாக உணர உதவும்.

பேரிகார்டு கட்டுப்பாடு: பாதுகாப்பா, பக்தர்களுக்கு சிரமமா?

கடற்கரையில் ஏற்கெனவே அதிக அளவில் பக்தர்கள் திரண்டிருந்ததால், ஒரு குறிப்பிட்ட நேரத்திற்குப் பிறகு புதிதாக வரும் பக்தர்களைக் கடற்கரைப் பகுதிக்குள் அனுமதிக்காமல் காவல்துறையினர் பேரிகார்டுகள் அமைத்து கட்டுப்படுத்தினர். இது கூட்ட நெரிசல் மற்றும் அசம்பாவிதங்களைத் தவிர்ப்பதற்கான பாதுகாப்பு நடவடிக்கை என்றாலும், தாமதமாக வந்த பக்தர்கள் பலர் நிகழ்ச்சியை நேரில் காண முடியாமல் சிரமப்பட்டனர்.

இருப்பினும், கடற்கரையில் இருந்த கூட்ட நெரிசலைக் கருத்தில் கொள்ளும்போது காவல்துறையின் இந்த முடிவு தவிர்க்க முடியாததாகவே இருந்தது. லட்சக்கணக்கான மக்கள் ஒரே இடத்தில் கூடும் நிகழ்ச்சியில் பாதுகாப்புக்கு முன்னுரிமை அளிப்பது அவசியம்.

அரசியல் வாழ்த்துகளும் பக்தர்களின் முணுமுணுப்பும்!

நிகழ்ச்சியின்போது வர்ணனையாளர்கள் தமிழக முதல்வர் விஜய்க்கு நன்றி மற்றும் வாழ்த்துகளைத் தெரிவித்தனர். இதனை தவெக ஆதரவாளர்கள் சிலர் ஆரவாரத்துடன் வரவேற்றனர். அதையும் தாண்டி அவர்கள் தமிழக முதல்வருக்கு ஹரோகரா என்றும் கோஷம் போட்டனர். அப்போது ஆன்மிக நிகழ்ச்சியில் இதுவரை இல்லாத வகையில் அரசியல் தலைவருக்கான வாழ்த்துகள் இடம்பெறுவது ஏன் என்று பக்தர்களில் சிலர் முணுமுணுத்தனர்.

மதம், ஆன்மிகம் மற்றும் அரசியல் ஆகியவை வெவ்வேறு தளங்களில் இயங்க வேண்டியவை என்ற கருத்து பக்தர்களிடையே நிலவுகிறது. எனவே, இதுபோன்ற பெரிய ஆன்மிக நிகழ்ச்சிகளில் அரசியல் சார்பற்ற பொதுவான அணுகுமுறையே அனைவராலும் வரவேற்கப்படும்.

அரசின் அக்கறை பாராட்டுக்குரியது; அடுத்த ஆண்டு மேலும் சிறப்பாகுமா?

மொத்தத்தில், இந்த ஆண்டு சூரசம்ஹார நிகழ்ச்சியில் பக்தர்களுக்கு எந்தவிதமான பெரிய சிரமமும் ஏற்பட்டுவிடக் கூடாது என்ற நோக்கில் தமிழக அரசின் இந்து சமய அறநிலையத்துறையும், மாவட்ட நிர்வாகமும், காவல்துறையும் மிகுந்த அக்கறையுடன் செயல்பட்டதைப் பார்க்க முடிந்தது. இந்து பக்தர்களின் நம்பிக்கையையும் உணர்வுகளையும் மதித்து, அவர்களிடம் நிர்வாகம் நல்ல பெயர் பெற வேண்டும் என்ற வகையில் பல்வேறு ஏற்பாடுகள் செய்யப்பட்டிருந்தன.

கடந்த காலங்களுடன் ஒப்பிடும்போது பல வசதிகள் மேம்பட்டிருந்தாலும், இந்த ஆண்டு ஏற்பட்ட அனுபவங்கள் சில திருத்தங்களின் அவசியத்தையும் உணர்த்தியுள்ளன. குறிப்பாக ஊடகப் பணியாளர்களுக்கான அடையாள நடைமுறை, டிஜிட்டல் திரைகளின் தடையற்ற ஒளிபரப்பு, திரைகளுக்கு முன்னால் வாகனங்கள் நிறுத்தப்படுவதைத் தடுப்பது, சூரசம்ஹாரத்திற்கான வர்ணனை முறை, கடற்கரை நுழைவுக் கட்டுப்பாட்டை முன்கூட்டியே அறிவிப்பது போன்ற அம்சங்களில் கூடுதல் கவனம் செலுத்த வேண்டும்.

லட்சக்கணக்கான பக்தர்கள் மத்தியில் ஆணவத்தின் அடையாளமான சூரபத்மனை முருகப்பெருமான் சம்ஹாரம் செய்தார். அதேபோல், நிர்வாகத்திலும் இருக்கும் குறைபாடுகள் அடுத்த ஆண்டுக்குள் சம்ஹாரம் செய்யப்பட வேண்டும் என்பதே பக்தர்களின் எதிர்பார்ப்பாக இருக்கிறது.

பழைய ஆண்டுகளைவிட இந்த ஆண்டு பரவாயில்லை என்ற மனநிறைவு இருந்தாலும், அடுத்த ஆண்டு இதைவிடச் சிறப்பாகவும், எந்தவிதமான குறைகளும் இல்லாத வகையிலும் சூரசம்ஹார விழாவை நடத்துவதற்கு இப்போதே திட்டமிட வேண்டும் என்பதே நமது யோசனையாகும்.