மதுராந்தகம்–தாராபுரம் இடைத்தேர்தல்: பிரச்சாரக் களத்தில் அனல்!

சென்னை:செப்.21

தமிழகத்தில் மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் பிரச்சாரம் நாளுக்கு நாள் சூடுபிடித்து வருகிறது. இரண்டு தொகுதிகளிலும் அடுத்த மாதம்(அக்டோபர்) 6-ம் தேதி வாக்குப்பதிவு நடைபெற உள்ள நிலையில், அரசியல் கட்சிகள் தீவிர தேர்தல் பணியில் ஈடுபட்டுள்ளன. 9-ம் தேதி வாக்குகள் எண்ணப்பட உள்ளன.

இந்த இடைத்தேர்தலின் முக்கிய அரசியல் பின்னணி, கடந்த சட்டமன்றத் தேர்தலில் அதிமுக சார்பில் போட்டியிட்டு வெற்றி பெற்ற மரகதம் குமரவேல் மற்றும் சத்தியபாமா ஆகிய இருவரும் தங்களது எம்.எல்.ஏ. பதவிகளை ராஜினாமா செய்து தமிழக வெற்றிக் கழகத்தில் இணைந்ததுதான். தற்போது அதே இரு தொகுதிகளிலும் தவெக சார்பில் அவர்களே மீண்டும் வேட்பாளர்களாக களம் இறங்கியுள்ளனர். மதுராந்தகத்தில் மரகதம் குமரவேலும், தாராபுரத்தில் சத்தியபாமாவும் போட்டியிடுகின்றனர். இதனால், “தேர்தலில் வெற்றி பெற்று எம்.எல்.ஏ. ஆனவர்கள் பதவிக்காலம் முடிவதற்கு முன்பே ராஜினாமா செய்ததால் மீண்டும் தேர்தல் நடத்த வேண்டிய நிலை ஏற்பட்டுள்ளது” என்ற விவகாரத்தை எதிர்க்கட்சிகள் பிரச்சாரத்தில் முக்கியமாக முன்வைத்து வருகின்றன.

மதுராந்தகத்தில் திமுக வேட்பாளர் இ.பரந்தாமன் உள்ளிட்ட எதிர்க்கட்சித் தலைவர்கள், மரகதம் குமரவேல் பதவி விலகிய விவகாரத்தை முன்வைத்து விமர்சனம் செய்து வருகின்றனர்.

வேட்புமனு தாக்கல் முடிவடைந்த நிலையில், மதுராந்தகம் மற்றும் தாராபுரம் ஆகிய இரு தொகுதிகளிலும் ஐந்து முனைப் போட்டி நிலவுவதாக தகவல்கள் வெளியாகியுள்ளன. திமுக, அதிமுக, தவெக, இடதுசாரிகள் மற்றும் நாம் தமிழர் கட்சி என பல்வேறு அரசியல் அணிகளின் வேட்பாளர்கள் களத்தில் இருப்பதால், ஒவ்வொரு கட்சியும் தங்களது வாக்கு வங்கியை தக்கவைத்துக்கொள்ள தீவிர பிரச்சாரத்தில் ஈடுபட்டுள்ளன.

திமுக சார்பில் மதுராந்தகத்தில் இ.பரந்தாமனும், தாராபுரத்தில் எஸ்.சுகன்யாவும் போட்டியிடுகின்றனர். நாம் தமிழர் கட்சி சார்பில் மதுராந்தகத்தில் கோ.ஜானகிராமனும், தாராபுரத்தில் மு.கார்த்திகாவும் போட்டியிடுகின்றனர்.

இரு தொகுதிகளிலும் தவெக வேட்பாளர்களாக களம் இறங்கியுள்ளவர்கள், கடந்த தேர்தலில் அதிமுக சார்பில் வெற்றி பெற்றவர்களே என்பதால், அவர்களது பதவி விலகல் விவகாரம் பிரச்சாரத்தின் மையப் பொருளாகியுள்ளது. “தேர்தலில் வெற்றி பெற்று மக்கள் பிரதிநிதியாக தேர்ந்தெடுக்கப்பட்டவர்கள், பின்னர் கட்சி மாறி பதவியை ராஜினாமா செய்துவிட்டு மீண்டும் அதே மக்களிடம் வாக்கு கேட்பது சரியா?” என்ற கேள்வியை எதிர்க்கட்சிகள் எழுப்பி வருகின்றன.

இதன் எதிரொலியாக சில இடங்களில் தவெக வேட்பாளர்களுக்கு எதிராக பொதுமக்கள் எதிர்ப்பு தெரிவிப்பதாகவும், கொடி பிடித்து எதிர்ப்பை வெளிப்படுத்தும் சம்பவங்கள் நடைபெறுவதாகவும் செய்திகள் வெளியாகியுள்ளன. தாராபுரத்தில் தவெக வேட்பாளர் சத்தியபாமாவின் கார் மீது தாக்குதல் நடந்ததாக புகார் எழுந்து, அதிமுக வேட்பாளர் உட்பட 9 பேர் மீது வழக்குப்பதிவு செய்யப்பட்டுள்ளதாகவும் தகவல் வெளியாகியுள்ளது.

இந்த இடைத்தேர்தலின் மற்றொரு முக்கிய அம்சம் இடதுசாரிகளின் நிலைப்பாடு. தவெக ஆட்சிக்கு வெளியிலிருந்து ஆதரவு அளித்து வந்த இந்திய கம்யூனிஸ்ட் கட்சியும் மார்க்சிஸ்ட் கம்யூனிஸ்ட் கட்சியும், இந்த இரண்டு இடைத்தேர்தல்களிலும் தவெகவை ஆதரிக்காமல் தனித்துப் போட்டியிடுகின்றன. தாராபுரத்தில் இந்திய கம்யூனிஸ்ட் கட்சியும், மதுராந்தகத்தில் மார்க்சிஸ்ட் கம்யூனிஸ்ட் கட்சியும் போட்டியிடுகின்றன. இதனால், ஒருபுறம் சட்டமன்ற அரசியலில் தவெக அரசுக்கு ஆதரவு என்ற நிலைப்பாடும், மறுபுறம் இடைத்தேர்தல் களத்தில் அதே ஆளும் கட்சிக்கு எதிராக போட்டி என்ற நிலைப்பாடும் உருவாகியுள்ளது.

இதன் காரணமாக தேர்தல் பிரச்சார மேடைகளில் கூட்டணி அரசியல் எல்லைகளைத் தாண்டி கட்சிகள் ஒன்றை ஒன்று கடுமையாக விமர்சிக்கும் சூழல் ஏற்பட்டுள்ளது. தவெக அரசுக்கு தங்களது ஆதரவு இல்லையென்றால் அரசு நிலைக்க முடியாது என்ற கருத்துகளையும் இடதுசாரி தரப்பினர் முன்வைத்துள்ளதாக செய்திகள் தெரிவிக்கின்றன.

மதுராந்தகம் மற்றும் தாராபுரம் இடைத்தேர்தல் இரண்டு தொகுதிகளுக்கான தேர்தல் என்றாலும், இதன் அரசியல் தாக்கம் மாநில அளவில் கவனிக்கப்படுகிறது. பதவி விலகி கட்சி மாறிய முன்னாள் எம்.எல்.ஏ.க்களை மீண்டும் மக்கள் ஏற்றுக்கொள்கிறார்களா? தவெக ஆட்சிக்கு எதிராக உள்ள விமர்சனங்கள் வாக்குகளாக மாறுமா? திமுக மற்றும் அதிமுக தங்களது பாரம்பரிய வாக்குகளை எந்த அளவுக்கு திரட்ட முடியும்? இடதுசாரிகளின் தனிப்போட்டி அவர்களது வாக்கு ஆதரவை எவ்வாறு வெளிப்படுத்தும்? நாம் தமிழர் கட்சி எவ்வளவு வாக்குகளைப் பெறும்? உள்ளூர் பிரச்சினைகள் மற்றும் வேட்பாளர்களின் தனிப்பட்ட செல்வாக்கு தேர்தல் முடிவில் எந்த அளவுக்கு தாக்கம் ஏற்படுத்தும்? என்பது உள்ளிட்ட பல கேள்விகள் எழுந்துள்ளன.

இரு தொகுதிகளிலும் தேர்தல் பிரச்சாரம் இன்னும் தீவிரமடைய உள்ள நிலையில், கடைசி கட்டத்தில் உருவாகும் அரசியல் சூழ்நிலை மற்றும் வாக்காளர்களின் முடிவு முக்கியத்துவம் பெறுகிறது. தேர்தல் பிரச்சாரம் ஏற்படுத்தும் தாக்கம் என்ன? யார் மீது மக்கள் அதிருப்தியை வெளிப்படுத்துகிறார்கள்? யாருக்கு ஆதரவு கிடைக்கிறது? என்பதற்கான தெளிவு அக்டோபர் 6-ம் தேதி வாக்குப்பதிவுக்குப் பின்னரும், அக்டோபர் 9-ம் தேதி வாக்கு எண்ணிக்கைக்குப் பின்னரும் தெரியவரும்.