“உலக விதிகளை உருவாக்கும் சக்தியாக உலகின் தெற்கு மாற வேண்டும்” – பிரதமர் மோடி

புதுடெல்லி: இந்தியா தலைமையில் 18-வது பிரிக்ஸ் உச்சி மாநாடு புதுடெல்லியில் இன்று தொடங்கியது. பிரதமர் நரேந்திர மோடி தலைமையில் நடைபெறும் இந்த மாநாட்டில் ரஷ்ய அதிபர் விளாடிமிர் புதின், சீன அதிபர் ஷி ஜின்பிங், ஈரான் அதிபர் மசூத் பெசெஷ்கியான் உள்ளிட்ட பிரிக்ஸ் நாடுகளின் தலைவர்கள் பங்கேற்றுள்ளனர்.

உலக அரசியல், பொருளாதாரம், வர்த்தகம், எரிசக்தி பாதுகாப்பு, உணவுப் பாதுகாப்பு, தொழில்நுட்பம், விநியோகச் சங்கிலி மற்றும் சர்வதேச அமைப்புகளில் சீர்திருத்தம் உள்ளிட்ட முக்கிய விவகாரங்கள் குறித்து தலைவர்கள் விவாதித்து வருகின்றனர். மாநாட்டை தொடங்கி வைத்து பேசிய பிரதமர் மோடி, பிரிக்ஸ் எந்த ஒரு நாட்டுக்கும் அல்லது மேற்கத்திய நாடுகளுக்கும் எதிரான கூட்டமைப்பு அல்ல என்று தெளிவுபடுத்தினார்.

வளரும் நாடுகளுக்கும், உலக தெற்கு நாடுகளுக்கும் சர்வதேச முடிவெடுக்கும் அமைப்புகளில் உரிய இடம் கிடைக்க வேண்டும் என்றும், பிரிக்ஸ் நாடுகள் தங்களது ஒற்றுமையையும் ஒருமித்த கருத்தையும் நடைமுறை நடவடிக்கைகளாக மாற்ற வேண்டும் என்றும் அவர் வலியுறுத்தினார். உலகளாவிய விதிகளை உருவாக்குவதில் “உலக தெற்கு” நாடுகள் வெறும் விதிகளை பின்பற்றுபவர்களாக இல்லாமல், விதிகளை உருவாக்கும் சக்தியாக மாற வேண்டிய நேரம் இது என்றும் மோடி கூறினார். சர்வதேச அமைப்புகள் தற்போதைய உலக நிலவரத்திற்கு ஏற்ப மாற்றியமைக்கப்பட வேண்டும் என்ற கருத்தையும் மோடி முன்வைத்தார்.

குறிப்பாக ஐக்கிய நாடுகள் பாதுகாப்பு கவுன்சிலில் சீர்திருத்தம் மேற்கொள்வதை இனியும் தாமதப்படுத்தக் கூடாது என்றும், வளரும் நாடுகளுக்கு சர்வதேச அமைப்புகளில் அதிக பிரதிநிதித்துவம் வழங்கப்பட வேண்டும் என்றும் அவர் வலியுறுத்தினார். ரஷ்ய அதிபர் விளாடிமிர் புதின் உள்ளிட்ட தலைவர்கள், பிரிக்ஸ் நாடுகளுக்கு இடையிலான வர்த்தகத்தில் உறுப்பு நாடுகளின் தேசிய நாணயங்களின் பயன்பாட்டை அதிகரிக்க வேண்டும் என்ற கருத்தை ஆதரித்தனர்.

மேற்கத்திய நாடுகளின் நிதி அமைப்புகளை மட்டுமே சார்ந்திருப்பதை குறைத்து, பிரிக்ஸ் நாடுகளுக்குள் நிதி மற்றும் பணப்பரிவர்த்தனை ஒத்துழைப்பை அதிகரிப்பது குறித்தும் விவாதிக்கப்பட்டது. ரஷ்யா–இந்தியா இடையிலான வர்த்தகம், எரிசக்தி, பாதுகாப்பு, தொழில்நுட்பம் உள்ளிட்ட துறைகளில் ஒத்துழைப்பை மேலும் அதிகரிப்பது குறித்தும் மோடி–புதின் சந்திப்பில் ஆலோசிக்கப்பட்டது.

ரஷ்ய அதிபர் புதின், பிரிக்ஸ் அமைப்பு வெறும் அரசியல் விவாதத்திற்கான அமைப்பாக இல்லாமல், தொழில்நுட்பம், உள்கட்டமைப்பு, முதலீடு மற்றும் பணப்பரிவர்த்தனை போன்ற துறைகளில் நடைமுறை ஒத்துழைப்பை உருவாக்கும் தளமாக மாற வேண்டும் என்ற கருத்தை முன்வைத்துள்ளார். மேற்கத்திய பொருளாதார அழுத்தங்கள் மற்றும் வர்த்தகத் தடைகள் உலக வர்த்தகத்தை பாதிப்பதாகவும் அவர் குறிப்பிட்டுள்ளார். சீன அதிபர் ஷி ஜின்பிங் இன்று புதுடெல்லி வந்துள்ளார். ஏழு ஆண்டுகளுக்குப் பிறகு அவர் இந்தியா வந்திருப்பது இந்த மாநாட்டில் முக்கியத்துவம் பெற்றுள்ளது.

இந்தியா–சீனா இடையிலான கருத்து வேறுபாடுகளை முறையாக கையாள வேண்டும் என்றும், இரு நாடுகளும் நீண்டகால மற்றும் மூலோபாய கண்ணோட்டத்தில் உறவுகளை மேம்படுத்த வேண்டும் என்றும் சீன தரப்பு தெரிவித்துள்ளது. இதன் தொடர்ச்சியாக மோடி–ஷி ஜின்பிங் சந்திப்பும் முக்கிய எதிர்பார்ப்பை ஏற்படுத்தியுள்ளது. ஈரான் அதிபர் மசூத் பெசெஷ்கியான், பிரிக்ஸ் நாடுகளுக்கு இடையிலான வர்த்தகத்தில் தேசிய நாணயங்களின் பயன்பாட்டை விரிவுபடுத்துவது முக்கியமான நடவடிக்கையாக இருக்கும் என்று வலியுறுத்தியுள்ளார். மேற்கு ஆசியாவில் நிலவும் போர் மற்றும் பதற்றத்துக்கு மத்தியில் பிராந்திய அமைதி மற்றும் தூதரக ரீதியான தீர்வுகளின் அவசியத்தையும் இந்தியா–ஈரான் தரப்புகள் வலியுறுத்தியுள்ளன.

உக்ரைன் போர், மேற்கு ஆசிய மோதல்கள் ஆகியவற்றால் உலக அளவில் எரிசக்தி, உணவு மற்றும் சரக்கு விநியோகச் சங்கிலிகள் பாதிக்கப்பட்டுள்ள நிலையில், அவற்றை பாதுகாப்பாகவும் தடையின்றியும் செயல்படுத்துவதற்கான ஒத்துழைப்பு குறித்தும் மாநாட்டில் கவனம் செலுத்தப்படுகிறது. கடல் வர்த்தகத்தில் ஏற்படும் இடையூறுகளை கருத்தில் கொண்டு, கடலோடிகளின் பாதுகாப்பு மற்றும் நலனுக்காக பிரிக்ஸ் நாடுகளுக்கிடையே கடலோடிகள் தொடர்பான வலையமைப்பை உருவாக்கும் யோசனையையும் பிரதமர் மோடி முன்வைத்துள்ளார்.

மாநாட்டில் பல்வேறு கருத்து வேறுபாடுகள் இருந்தபோதிலும், பிரிக்ஸ் நாடுகள் கூட்டுப் பிரகடனத்தில் உடன்பாடு எட்டியுள்ளதாக தகவல்கள் வெளியாகியுள்ளன. எந்த ஒரு நாட்டின் பெயரையும் குறிப்பிடாமல், ஒருதலைப்பட்சமான போர் நடவடிக்கைகளுக்கு எதிரான கருத்து அதில் இடம்பெற உள்ளதாக தகவல்கள் தெரிவிக்கின்றன. குறிப்பாக ஈரான் மற்றும் ஐக்கிய அரபு அமீரகம் ஆகிய நாடுகளின் மாறுபட்ட நிலைப்பாடுகளுக்கு இடையே ஒருமித்த கருத்தை உருவாக்குவது முக்கிய சவாலாக இருந்ததாக கூறப்படுகிறது. பிரிக்ஸ் அமைப்பில் தற்போது 11 நாடுகள் இடம்பெற்றுள்ளன. உலக மக்கள் தொகையில் சுமார் பாதியை பிரதிநிதித்துவப்படுத்தும் இந்த அமைப்பு, உலக பொருளாதாரம் மற்றும் சர்வதேச அரசியலில் வளரும் நாடுகளின் செல்வாக்கை அதிகரிக்கும் முக்கிய தளமாக மாறி வருகிறது.

இந்த நிலையில், “உலக தெற்கு நாடுகளின் குரல்” சர்வதேச முடிவெடுக்கும் அமைப்புகளில் அதிகரிக்க வேண்டும் என்பதே இந்தியாவின் தலைமையிலான இந்த ஆண்டு பிரிக்ஸ் மாநாட்டின் முக்கிய நோக்கங்களில் ஒன்றாக பார்க்கப்படுகிறது. இந்த மாநாடு வெறும் பொருளாதார ஒத்துழைப்பு கூட்டமாக இல்லாமல், மாறிவரும் உலக அரசியல் சூழலில் புதிய சர்வதேச ஒழுங்கை உருவாக்குவதில் பிரிக்ஸ் நாடுகள் எந்த அளவுக்கு ஒருமித்த கருத்துடன் செயல்படுகின்றன என்பதை வெளிப்படுத்தும் முக்கிய மாநாடாகவும் அமைந்துள்ளது.