தட்டப்பாறை விலக்கில் மேம்பாலம் கட்டும் பணி - சர்வீஸ் ரோடு குறுகலாக அமைவதாக புகார்

தூத்துக்குடி, செப்.15:

தூத்துக்குடி–திருநெல்வேலி தேசிய நெடுஞ்சாலையில் போக்குவரத்து நெரிசல் மற்றும் விபத்துகளை குறைக்கும் வகையில் பல்வேறு முக்கிய சந்திப்புகளில் மேம்பாலங்கள் அமைக்கும் பணிகள் நடைபெற்று வருகின்றன. அமையவுள்ள தட்டப்பாறை விலக்கு மேம்பாலத்தின்  அகலமும் உயரமும் குறையக் கூடாது என்றும் சர்வீஸ் ரோடு விசாலமாக அமைக்க வேண்டும், கன்டெய்னர் லாரிகள், ஆம்னி பேருந்துகள் தடையின்றி செல்லும் வகையில் திட்டமிட வேண்டும் என்றும் கோரிக்கை விடுக்கப்பட்டுள்ளது. 

தூத்துக்குடி–திருநெல்வேலி தேசிய நெடுஞ்சாலையில் தட்டப்பாறை விலக்கு பகுதியில் மேம்பாலம் அமைப்பதற்கான ஆயத்தப் பணிகள் தொடங்கியுள்ள நிலையில், மேம்பாலத்தின் அகலம் மற்றும் உயரத்தை குறைக்காமல், சர்வீஸ் ரோட்டையும் போதிய அகலத்துடன் அமைக்க வேண்டும் என்று பொதுமக்கள் மற்றும் வாகன ஓட்டிகள் கோரிக்கை விடுத்துள்ளனர். தற்போது மேம்பாலம் அமையவுள்ள பகுதியின் இருபுறங்களிலும் சர்வீஸ் ரோடு அமைக்கும் பணிகள் தொடங்கியுள்ளன. மழைக்காலங்களில் தண்ணீர் தேங்காமல் செல்லும் வகையில் சிமெண்ட் கால்வாய் அமைக்கும் பணியும் நடைபெற்று வருகிறது. இதற்கும் மேம்பாலப் பகுதிக்கும் இடையில் சர்வீஸ் ரோடு அமைய உள்ளது. சர்வீஸ் ரோட்டை கூடுதல் அகலத்துடன் அமைக்க வேண்டும் என்ற கோரிக்கையை நிறைவேற்றும் வகையில் மேம்பாலத்தின் அகலத்தை குறைத்து விடக்கூடாது என்பதே பொதுமக்களின் முக்கிய எதிர்பார்ப்பாக உள்ளது. 

தூத்துக்குடி–திருநெல்வேலி தேசிய நெடுஞ்சாலையில் ஏற்கனவே பல்வேறு சந்திப்புகளில் மேம்பாலப் பணிகள் மேற்கொள்ளப்பட்டு வருகின்றன. 2025-ல் வெளியான தகவலின்படி, தூத்துக்குடி மாவட்டத்தில் விபத்து அபாயம் அதிகம் உள்ள பகுதிகளில் மொத்தம் 12 மேம்பாலப் பணிகள் மேற்கொள்ளப்பட்டு வருவதாகவும், அவற்றில் தூத்துக்குடி–திருநெல்வேலி சாலையில் மாவட்ட ஆட்சியர் அலுவலகம், கோரம்பள்ளம், மங்களகிரி, முறப்பநாடு, வசவப்பபுரம் உள்ளிட்ட இடங்கள் இடம்பெற்றுள்ளதாகவும் தெரிவிக்கப்பட்டது. எனவே தட்டப்பாறை விலக்கு பகுதியில் தற்போது அமைக்கப்பட்டு வரும் மழைநீர் கால்வாய், சர்வீஸ் ரோடு மற்றும் எதிர்கால மேம்பால கட்டுமானத்திற்கான இடவசதி ஆகியவற்றை தேசிய நெடுஞ்சாலைத் துறை அதிகாரிகள் மீண்டும் ஒருமுறை ஆய்வு செய்ய வேண்டும் என்று பொதுமக்கள் கோரிக்கை விடுத்துள்ளனர். தேவையான இடவசதி இருப்பின், திட்டத்தில் சாத்தியமான மாற்றங்களை செய்து சர்வீஸ் ரோட்டை சற்று கூடுதல் அகலத்திலும், தரமான சாலை அமைப்பிலும் உருவாக்க வேண்டும் என்பதே வாகன ஓட்டிகளின் எதிர்பார்ப்பாக உள்ளது.

தட்டப்பாறை பகுதி தூத்துக்குடி–திருநெல்வேலி முக்கிய போக்குவரத்து வழித்தடத்தில் அமைந்துள்ளதால், எதிர்கால போக்குவரத்து தேவையையும் கருத்தில் கொண்டு மேம்பாலத்தின் கட்டுமானத்தை திட்டமிட வேண்டும் என அவர்கள் தெரிவிக்கின்றனர். தூத்துக்குடி துறைமுகத்திலிருந்தும் துறைமுகத்தை நோக்கியும் தினமும் ஏராளமான கன்டெய்னர் லாரிகள் சென்று வருகின்றன. பெரிய அளவிலான கன்டெய்னர் பெட்டிகளுடன் செல்லும் டிரைலர் லாரிகளும் இந்த வழித்தடத்தை பயன்படுத்துகின்றன.

எனவே, மேம்பாலத்தின் அடிப்பகுதியில் டிரைலர் லாரிகள் சென்று திணறாமல் வெளியேறும் அளவுக்கு போதிய அகலம் இருக்க வேண்டும் என்றும், பாலத்தின் தூண்கள், தடுப்புகள் அல்லது அணுகுமுறைகள் காரணமாக கனரக வாகனங்களின் திருப்பத்தில் சிரமம் ஏற்படக்கூடாது என்றும் வாகன ஓட்டிகள் கூறுகின்றனர். அதேபோல் பாலத்தின் கீழ் செல்லும் வாகனங்களின் உயரத்தையும் அதிகாரிகள் கணக்கில் எடுத்துக்கொள்ள வேண்டும். தூத்துக்குடி யூனியன் அலுவலகம் அருகே உள்ள மேம்பாலத்தின் அடிப்பகுதியில் சில உயரமான ஆம்னி பேருந்துகள் செல்ல முடியாத நிலை இருப்பதாக அப்பகுதி மக்கள் சுட்டிக்காட்டுகின்றனர். இதுபோன்ற பிரச்சினை தட்டப்பாறை விலக்கு மேம்பாலத்திலும் ஏற்படக்கூடாது என்பதே அவர்களின் கோரிக்கையாக உள்ளது. மேலும், மங்களகிரி விலக்கு பகுதியில் அமைக்கப்பட்டு வரும் மேம்பாலத்தின் கீழ் வாகனங்கள் தடையின்றி சென்று வெளியேறும் வகையில் போதிய இடவசதி உள்ளதா என்பதையும் அதிகாரிகள் ஆய்வு செய்ய வேண்டும் என பொதுமக்கள் வலியுறுத்துகின்றனர்.

யூனியன் ஆபீஸ் அருகே உள்ள மேம்பாலம் பயன்பாட்டுக்கு வந்த பின்னர், திருநெல்வேலி வழித்தடத்தில் இருந்து தூத்துக்குடி நோக்கி வரும் எந்த பேருந்துகளும்  புதுக்கோட்டை ஊருக்குள் வந்து செல்ல முடியாத நிலை ஏற்பட்டுவிட்டது. நெல்லை, ஸ்ரீவைகுண்டம், செக்காரக்குடி உள்ளிட்ட வழித்தடங்களில் இருந்து தூத்துக்குடி நோக்கி வரும் எந்த பேருந்துகளும் கடந்த ஒன்றரை ஆண்டுகளாக புதுக்கோட்டை ஊருக்குள் வந்து செல்லவில்லை. அந்த பாலத்தின் அடிப்பகுதியில் மேலும் ஒரு வழித்தடம் அமைத்து ஒரு வழியாக பேருந்துகள் புதுக்கோட்டை ஊருக்குள் சென்று பாலத்தின் இன்னொரு வழியாக வெளியே செல்லும்படி செய்ய வேண்டும் என பொதுமக்கள் கோரிக்கை விடுத்து வருகின்றனர். அந்த கோரிக்கையையும் தேசிய நெடுஞ்சாலைத்துறை நிறைவேற்ற வேண்டும். அப்போதுதான் புதுக்கோட்டை சுற்றுவட்டார பகுதி மக்களின் போக்குவரத்து குறை நிவர்த்தியாகும். இதுபோன்ற அனுபவங்களை கருத்தில் கொண்டு, தட்டப்பாறை விலக்கு மேம்பாலத்தை கட்டி முடித்த பிறகு மாற்றம் செய்ய வேண்டிய நிலை ஏற்படாத வகையில், கட்டுமானத்திற்கு முன்பே அனைத்து போக்குவரத்து தேவைகளையும் ஆய்வு செய்ய வேண்டும் என்று பொதுமக்கள் தெரிவிக்கின்றனர்.

குறிப்பாக பாலத்தின் அடிப்பகுதியில் வாகனங்கள் ஒரு வழியாக உள்ளே சென்று, பாதுகாப்பாக மற்றொரு வழியாக வெளியேறும் வகையில் தேவையான கூடுதல் வழித்தடங்கள் அமைக்க வேண்டும். பேருந்துகள், கார்கள், இருசக்கர வாகனங்கள் மட்டுமின்றி துறைமுகத்தை நோக்கிச் செல்லும் கன்டெய்னர் டிரைலர் லாரிகளின் திருப்பம், உயரமான ஆம்னி பேருந்துகளின் இயக்கம், அவசரகால வாகனங்கள் மற்றும் எதிர்கால போக்குவரத்து அதிகரிப்பு ஆகியவற்றையும் கருத்தில் கொண்டு வடிவமைப்பு இருக்க வேண்டும் என கோரிக்கை விடுக்கப்பட்டுள்ளது.

இதனால் தேசிய நெடுஞ்சாலைத் துறை அதிகாரிகள் தட்டப்பாறை விலக்கு பகுதியில் நடைபெற்று வரும் ஆயத்தப் பணிகளை நேரில் ஆய்வு செய்து, மேம்பாலத்தின் அகலம் குறையாமல் இருக்க வேண்டும். பாலத்தின் கீழ் கன்டெய்னர் டிரைலர்கள் திரும்பிச் செல்லும் அளவுக்கு இடவசதி இருக்க வேண்டும். உயரமான ஆம்னி பேருந்துகள் தடையின்றி செல்லும் வகையில் பாலத்தின் உயரம் இருக்க வேண்டும். சர்வீஸ் ரோடு விசாலமாகவும் தரமாகவும் அமைக்கப்பட வேண்டும். மழைநீர் கால்வாய் காரணமாக சாலை அகலம் பாதிக்கப்படக்கூடாது. பாலத்தின் கீழ் தேவையான நுழைவு–வெளியேறும் வழித்தடங்கள் அமைக்கப்பட வேண்டும் என்பவற்றை உறுதி செய்ய வேண்டும் என்று பொதுமக்கள் மற்றும் வாகன ஓட்டிகள் வலியுறுத்துகின்றனர்.

“இப்போது சரியாக திட்டமிட்டு கட்டினால் மட்டுமே எதிர்காலத்தில் போக்குவரத்து பிரச்சினைகளை தவிர்க்க முடியும். பாலம் கட்டி முடித்த பிறகு மாற்றம் செய்வதைவிட, கட்டுமான நிலையிலேயே தேவையான அகலம், உயரம் மற்றும் சர்வீஸ் ரோடு வசதிகளை உறுதி செய்ய வேண்டும்” என்பதே பொதுமக்களின் எதிர்பார்ப்பாக உள்ளது. மேம்பாலம் அமைப்பதன் நோக்கம் போக்குவரத்தை எளிதாக்குவதும் விபத்துகளை குறைப்பதும்தான். அந்த நோக்கம் கட்டுமான காலத்திலும் பாதிக்கப்படாமல் இருக்க, சர்வீஸ் ரோட்டின் அகலம் மற்றும் தரம் குறித்து அதிகாரிகள் கவனம் செலுத்த வேண்டும் என்பதே பொதுமக்களின் எதிர்பார்ப்பாக உள்ளது.

நடுநிலை.காம்