விஜய் பேச்சு சர்ச்சை முதல் சேகர்பாபுவின் கோயில் தரிசனம் வரை...அரங்கேறுவது அரசியல் மடைமாற்றமா?”

சென்னை: தமிழ்நாடு சட்டப்பேரவையில் முதலமைச்சர் விஜய், முன்னாள் முதலமைச்சர் மு.க.ஸ்டாலின் மற்றும் மிசா காலத்தில் நடைபெற்ற சம்பவங்கள் தொடர்பாக பேசிய விவகாரம் திமுக–தவெக இடையிலான அரசியல் மோதலை மேலும் தீவிரப்படுத்தியுள்ளது. சட்டப்பேரவையில் விஜய் பேசியபோது அவர் காட்டிய ஒரு சைகையும் திமுக தரப்பில் கடும் எதிர்ப்பை ஏற்படுத்தியது. இதனைத் தொடர்ந்து, விஜயின் பேச்சுக்கு கண்டனம் தெரிவித்து தமிழகம் முழுவதும் திமுக சார்பில் போராட்டங்கள் நடத்தப்பட்டன. 

சென்னை உள்ளிட்ட பல்வேறு இடங்களில் நடைபெற்ற போராட்டங்களில் திமுகவின் முன்னணி நிர்வாகிகள் கலந்து கொண்டு முதலமைச்சர் விஜயை கடுமையாக விமர்சித்தனர். முன்னாள் அமைச்சர் சேகர்பாபு, முதலமைச்சர் விஜயை கடுமையான வார்த்தைகளால் விமர்சித்தது தொடர்பான வீடியோ சமூக வலைதளங்களில் வேகமாக பரவியது. குறிப்பாக, விஜயை ஒருமையில் குறிப்பிட்டு அவர் பேசிய சில வார்த்தைகள் அரசியல் வட்டாரத்தில் சர்ச்சையை ஏற்படுத்தின. 

அதேபோல், திமுக துணைப் பொதுச்செயலாளரும் நாடாளுமன்ற உறுப்பினருமான ஆ.ராசா, சென்னை சைதாப்பேட்டையில் நடைபெற்ற போராட்டத்தில் முதலமைச்சர் விஜயையும், தமிழக சட்டத்துறை அமைச்சர் சி.டி.ஆர். நிர்மல் குமாரையும் கடுமையாக விமர்சித்தார். குறிப்பாக நிர்மல் குமாரின் பிறப்பு தொடர்பாக ஆ.ராசா பயன்படுத்திய வார்த்தைகள் பெரும் சர்ச்சையை ஏற்படுத்தின. இந்த பேச்சுக்கு பல்வேறு அரசியல் கட்சிகளைச் சேர்ந்தவர்கள் கண்டனம் தெரிவித்தனர்.

தொடர்ந்து ஏற்பட்ட கடும் விமர்சனங்களுக்குப் பின்னர் ஆ.ராசா தனது பேச்சு குறித்து விளக்கம் அளித்தார். “உணர்ச்சி உந்துதலில் பேசி விட்டேன்; எனது வார்த்தைகளை திரும்பப் பெறுகிறேன்” என்று அவர் தெரிவித்தார். இதன் மூலம் சர்ச்சைக்கு முற்றுப்புள்ளி வைக்க அவர் முயன்றார். இந்தச் சூழலில் திமுக துணைப் பொதுச்செயலாளர் கனிமொழி, தனது சமூக வலைதளப் பக்கத்தில் “யாகாவாராயினும் நா காக்க” என்ற திருக்குறளை பதிவிட்டது அரசியல் வட்டாரத்தில் முக்கியத்துவம் பெற்றது.

இந்த பதிவு ஆ.ராசாவின் சர்ச்சைக்குரிய பேச்சை நேரடியாகக் குறிப்பிடாமல் இருந்தாலும், அவரது பேச்சுக்குப் பின்னர் வெளியானதால், பொது மேடைகளில் பேசும்போது வார்த்தைகளை கட்டுப்படுத்த வேண்டும் என்ற கட்சிக்குள் இருந்து வந்த அறிவுரையாகவே அரசியல் வட்டாரங்களில் பார்க்கப்பட்டது. வள்ளுவர் கூறும் அந்தக் குறளின் பொருளும், எதை காக்க முடியாவிட்டாலும் நாவையாவது காக்க வேண்டும்; இல்லையெனில் சொன்ன வார்த்தையே துன்பத்திற்கு காரணமாகிவிடும் என்பதாகும். 

விஜய்–திமுக மோதல் ஏற்கனவே அரசியல் ரீதியாக தீவிரமடைந்துள்ள நிலையில், போராட்ட மேடைகளில் திமுகவின் சில முக்கிய தலைவர்கள் பயன்படுத்திய கடுமையான வார்த்தைகள் சமூக வலைதளங்களில் பரவியது புதிய விவாதத்தை ஏற்படுத்தியது. குறிப்பாக ஆ.ராசாவின் பேச்சு தொடர்பான வீடியோக்கள் பரவியதுடன், அதற்கு கூட்டணிக் கட்சிகள் மற்றும் பல்வேறு அரசியல் தலைவர்கள் கண்டனம் தெரிவித்தனர். மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகமும் ஆ.ராசாவின் பேச்சை விமர்சித்தார். இதனால் “அரசியல் விமர்சனத்திற்கும் தனிப்பட்ட முறையிலான கடுமையான வார்த்தைகளுக்கும் இடையிலான எல்லை எது?” என்ற விவாதமும் எழுந்துள்ளது.

இந்த பரபரப்பான சூழலில், முன்னாள் அமைச்சர் சேகர்பாபு திருவண்ணாமலை அருணாசலேஸ்வரர் கோவிலுக்கு சென்ற சம்பவமும் கவனம் பெற்றுள்ளது. அங்கு அவருக்கு வழக்கமான விஐபி தரிசனம் கிடைக்காத நிலையில், கோயில் ஊழியர்கள் இல்லாததால் சிறிது நேரம் காத்திருந்த அவர், பின்னர் சாதாரண வரிசை வழியாகச் சென்று சுவாமி தரிசனம் செய்ததாக செய்திகள் வெளியாகின. முன்னாள் இந்து சமய அறநிலையத்துறை அமைச்சராக இருந்த சேகர்பாபு, விஐபி தரிசனம் இல்லாமல் பொதுமக்களுடன் வரிசையில் நின்று தரிசனம் செய்தது தொடர்பான காட்சிகளும் சமூக வலைதளங்களில் கவனம் பெற்றுள்ளன.

இதனைத் தொடர்ந்து திமுக எதிர்ப்பாளர்கள் சிலர், கடந்த இரு நாட்களாக திமுக தலைவர்களின் கடுமையான பேச்சுகள் தொடர்பாக சமூக வலைதளங்களில் ஏற்பட்ட எதிர்மறையான விமர்சனங்களை திசைதிருப்பும் வகையில் சேகர்பாபுவின் கோயில் தரிசன சம்பவம் முன்னிலைப்படுத்தப்படுவதாக விமர்சித்து வருகின்றனர். “முதலமைச்சர் விஜயை கடுமையான வார்த்தைகளால் விமர்சித்த வீடியோ வைரலான நிலையில், தற்போது கோயிலில் சாதாரண பக்தரைப் போல தரிசனம் செய்தது தொடர்பான செய்திகள் முக்கியத்துவம் பெறுகின்றன; இதன் பின்னணியில் அரசியல் கணக்கு இருக்கிறதா?” என்ற கேள்வியையும் சிலர் எழுப்புகின்றனர். ஆனால், சேகர்பாபு திட்டமிட்டு அரசியல் மடைமாற்றத்திற்காகவே கோயிலுக்குச் சென்றார் என்பதற்கு இதுவரை உறுதியான ஆதாரம் வெளியாகவில்லை. எனவே இதை அரசியல் விமர்சகர்களின் கருத்தாக மட்டுமே பார்க்க வேண்டிய நிலை உள்ளது.

இதற்கிடையே தற்போதைய அறநிலையத்துறை அமைச்சர், பொது தரிசன வழியில் சென்று சுவாமி தரிசனம் செய்வதில் எந்தவிதமான மரியாதைக் குறைவும் இல்லை என்றும், அதிகாரிகளுக்கு நிறைய வேலை இருந்ததால் முன்னாள் அமைச்சர் சேகர்பாபுடன் யாரும் வரவில்லை என்றும் செய்தியாளர்களிடம் தெரிவித்தார். 

இதனால், ஒரு பக்கம் விஜய்–திமுக அரசியல் மோதல், மறுபக்கம் திமுக தலைவர்களின் பேச்சுகள் தொடர்பான சர்ச்சை, அதனைத் தொடர்ந்து கனிமொழியின் ‘நா காக்க’ பதிவு மற்றும் ஆ.ராசாவின் வருத்தம், இவற்றுக்கு நடுவே சேகர்பாபுவின் திருவண்ணாமலை தரிசனம் ஆகியவை தமிழக அரசியலில் அடுத்தடுத்த விவாதங்களாக மாறியுள்ளன. 

முதலமைச்சர் விஜய் சட்டப்பேரவையில் திமுகவின் கடந்தகாலத்தை விமர்சிப்பதும், அதற்கு திமுக தலைவர்கள் போராட்டங்கள் மற்றும் பொதுக்கூட்டங்கள் மூலம் பதிலடி கொடுப்பதும் தமிழக அரசியலில் புதிய அரசியல் மோதலுக்கு வழிவகுத்துள்ளது. ஆனால், இந்த அரசியல் மோதலில் தனிநபர் விமர்சனங்களும் கடுமையான வார்த்தைகளும் அதிகரிப்பது எந்தக் கட்சிக்கு அரசியல் ரீதியாக சாதகமாக இருக்கும்? என்பதே தற்போது எழுந்துள்ள முக்கிய கேள்வியாக உள்ளது.

குறிப்பாக, “யாகாவாராயினும் நா காக்க” என்ற வள்ளுவரின் அறிவுரையை கனிமொழி சுட்டிக்காட்டியிருப்பது, இந்த விவகாரத்தில் திமுகவும் தனது தலைவர்களின் பொதுமேடைப் பேச்சுகள் குறித்து ஒரு கட்டுப்பாட்டை எதிர்பார்க்கிறதா என்ற கேள்வியையும் அரசியல் வட்டாரத்தில் எழுப்பியுள்ளது. 

— நடுநிலை.காம்