தூத்துக்குடியில் கோலாகலமாக நடைபெற்ற விநாயகர் சிலை ஊர்வலம்

தூத்துக்குடி, செப்.20:

விநாயகர் சதுர்த்தி விழாவை முன்னிட்டு தூத்துக்குடியில் பிரதிஷ்டை செய்யப்பட்ட விநாயகர் சிலைகள் இன்று பலத்த போலீஸ் பாதுகாப்புடன் ஊர்வலமாக எடுத்துச் செல்லப்பட்டு கடலில் விஜர்சனம் செய்யப்பட்டன. தூத்துக்குடி மாநகரம் மற்றும் புறநகர் பகுதிகளில் இருந்து மொத்தம் 92 விநாயகர் சிலைகள் ஊர்வலமாக எடுத்துச் செல்லப்பட்டு நீர்நிலைகளில் கரைக்கப்பட்டன.

விநாயகர் சதுர்த்தியை முன்னிட்டு தூத்துக்குடி மாவட்டத்தின் பல்வேறு பகுதிகளில் இந்து முன்னணி, இந்து மக்கள் கட்சி உள்ளிட்ட இந்து அமைப்புகளின் சார்பில் கடந்த 14-ம் தேதி விநாயகர் சிலைகள் பிரதிஷ்டை செய்யப்பட்டு சிறப்பு பூஜைகள் மற்றும் வழிபாடுகள் நடைபெற்றன. மாவட்டம் முழுவதும் 500-க்கும் மேற்பட்ட விநாயகர் சிலைகள் பிரதிஷ்டை செய்யப்பட்டதாக தெரிவிக்கப்பட்டுள்ளது.

திருச்செந்தூர், உடன்குடி, சாத்தான்குளம், நாசரேத், ஆத்தூர், ஆறுமுகநேரி, கோவில்பட்டி, விளாத்திகுளம் உள்ளிட்ட பகுதிகளில் பிரதிஷ்டை செய்யப்பட்ட சிலைகள் கடந்த சில நாட்களாக ஊர்வலமாக எடுத்துச் செல்லப்பட்டு அப்பகுதிகளில் நிர்ணயிக்கப்பட்ட நீர்நிலைகளில் கரைக்கப்பட்டன. இதன் தொடர்ச்சியாக தூத்துக்குடி மாநகரப் பகுதிகளில் பிரதிஷ்டை செய்யப்பட்ட விநாயகர் சிலைகளின் ஊர்வலம் இன்று நடைபெற்றது. இந்து முன்னணி சார்பில் பிரதிஷ்டை செய்யப்பட்ட 40 சிலைகளும், இந்து மக்கள் கட்சி சார்பில் பிரதிஷ்டை செய்யப்பட்ட 17 சிலைகளும் என மொத்தம் 57 சிலைகள் தூத்துக்குடி சிவன் கோயில் தபசு மண்டபம் மற்றும் தேரடி பகுதிக்கு மதியம் கொண்டு வரப்பட்டன. நிகழ்ச்சிக்கு இந்து முன்னணி மாநகர் மாவட்டத் தலைவர் இசக்கிமுத்துக்குமார் தலைமை வகித்தார். சிறப்பு விருந்தினராக மன்னார்குடி செண்டலங்கார செண்பகமன்னார் ராமானுஜ ஜீயர் சுவாமிகள் கலந்து கொண்டு விநாயகர் சிலை ஊர்வலத்தை தொடங்கி வைத்தார். 

இந்து முன்னணி திருச்சி கோட்டத் தலைவர் கனகராஜ் சிறப்பு அழைப்பாளராக கலந்து கொண்டு பேசினார். நிகழ்ச்சியில் இந்து முன்னணி, பாஜக, ஆர்எஸ்எஸ் உள்ளிட்ட பல்வேறு அமைப்புகளின் நிர்வாகிகள் மற்றும் தொண்டர்கள் கலந்து கொண்டனர். தொடர்ந்து விநாயகர் சிலைகள் வடக்கு ரதவீதி, காசுக்கடை பஜார், 1-ம் கேட், மட்டக்கடை, கடற்கரை சாலை வழியாக ஊர்வலமாக எடுத்துச் செல்லப்பட்டு திரேஸ்புரம் சங்குமுக கடற்கரைக்கு கொண்டு செல்லப்பட்டன. அங்கு விநாயகர் சிலைகள் கடலில் விஜர்சனம் செய்யப்பட்டன. இதேபோல் முத்தையாபுரம், புதுக்கோட்டை உள்ளிட்ட பகுதிகளில் பிரதிஷ்டை செய்யப்பட்ட 35 விநாயகர் சிலைகளும் தனியாக ஊர்வலமாக எடுத்துச் செல்லப்பட்டு தூத்துக்குடி புதிய துறைமுக கடற்கரை பகுதியில் கடலில் கரைக்கப்பட்டன. மேலும், தூத்துக்குடி மாநகரம் மற்றும் புறநகர் பகுதிகளில் வீடுகளில் வைத்து வழிபாடு செய்யப்பட்ட சிறிய அளவிலான விநாயகர் சிலைகளும் பொதுமக்களால் கடலில் கரைக்கப்பட்டன. 

விநாயகர் சிலை ஊர்வலம் மற்றும் விஜர்சன நிகழ்ச்சியை முன்னிட்டு சட்டம்-ஒழுங்கு, போக்குவரத்து மற்றும் பொதுமக்களின் பாதுகாப்பை கருத்தில் கொண்டு தூத்துக்குடி மாவட்ட காவல்துறை சார்பில் விரிவான பாதுகாப்பு ஏற்பாடுகள் செய்யப்பட்டிருந்தன. மாவட்ட எஸ்.பி. சிவபிரசாத் மேற்பார்வையில் ஏடிஎஸ்பிக்கள், டிஎஸ்பிக்கள் மற்றும் காவல்துறை அதிகாரிகள் தலைமையில் 250-க்கும் மேற்பட்ட போலீசார் பாதுகாப்புப் பணியில் ஈடுபட்டனர். ஊர்வலம் சென்ற முக்கிய சாலைகள் மற்றும் சிலைகள் கரைக்கப்பட்ட கடற்கரை பகுதிகளில் போலீசார் பாதுகாப்புப் பணியில் ஈடுபட்டதுடன், போக்குவரத்து நெரிசலை கட்டுப்படுத்தவும் நடவடிக்கை மேற்கொண்டனர். விநாயகர் சிலை ஊர்வலம் மற்றும் விஜர்சனம் நிகழ்ச்சி நிறைவடைந்ததைத் தொடர்ந்து தூத்துக்குடியில் விநாயகர் சதுர்த்தி விழாவின் முக்கிய நிகழ்வுகள் நிறைவடைந்தன.

பாக்ஸ் செய்தி 

விநாயகர் சதுர்த்தி என்பது இந்தியாவின் பல பகுதிகளில் கோடிக்கணக்கான மக்களின் நம்பிக்கையுடன் கொண்டாடப்படும் முக்கியமான பண்டிகையாகும். விழாவையொட்டி விநாயகர் சிலைகளை பிரதிஷ்டை செய்து பூஜைகள் நடத்தி, பின்னர் அவற்றை ஊர்வலமாக எடுத்துச் சென்று நீர்நிலைகளில் கரைப்பது நீண்ட காலமாகப் பின்பற்றப்படும் நடைமுறையாக இருந்து வருகிறது.

பாரம்பரியமாக இயற்கை மண் போன்ற பொருட்களால் செய்யப்பட்ட சிலைகள் வழிபாட்டுக்குப் பின்னர் நீரில் கரைவது, உருவாக்கப்பட்ட பொருள் மீண்டும் இயற்கையுடன் இணைவதை குறிக்கும் ஆன்மிகத் தத்துவமாகப் பார்க்கப்படுகிறது. அதாவது மழை நீர் ஆற்றில் வேகமாக செல்லும் போது ஆற்று மணல் இடம் பெயர்கிறது. அந்த இடத்தை நிரப்புவதற்கே களிமண்ணால் ஆன விநாயகர் சிலைகளை அங்கு கரைப்பதாக கூறப்படுகிறது. அப்படியானால் விநாயகர் சிலை ஊர்வலம் ஆறுகளை நோக்கியே போகவேண்டும். அப்படி நடப்பதாக தெரியவில்லை. கடலிலும் கரைக்கப்படுகிறது. மேலும் நடைமுறை மாற்றத்துடன் சிலை தயாரிப்பு முறையிலும், சிலைகளின் அளவிலும் பெரிய மாற்றங்கள் ஏற்பட்டுள்ளன. பல இடங்களில் முன்பு இருந்த சிறிய அளவிலான மண் சிலைகளுக்கு பதிலாக மிகப்பெரிய சிலைகள் உருவாக்கப்படுகின்றன. சிலைகளில் பிளாஸ்டர் ஆஃப் பாரிஸ் (PoP), செயற்கை வண்ணங்கள், பிளாஸ்டிக் மற்றும் பிற நீரில் எளிதில் கரையாத பொருட்கள் பயன்படுத்தப்படுகின்றன. அதனை தடுக்க அரசு நிர்வாகம் அறிவுறுத்தி வருவதை பார்க்கிறோம். 

தமிழ்நாடு மாசுக்கட்டுப்பாட்டு வாரியம் வெளியிட்டுள்ள தகவலின்படி, PoP முழுமையாக நீரில் கரையாமல் சுற்றுச்சூழல் பாதிப்பை ஏற்படுத்தக்கூடும். சிலைகளில் பயன்படுத்தப்படும் நச்சுத்தன்மை கொண்ட வண்ணங்களில் உள்ள சில உலோகங்கள் நீரின் தரத்தை பாதிக்கக்கூடும் என்றும், நீர்வாழ் சூழலுக்கும் பாதிப்பு ஏற்படும் வாய்ப்பு உள்ளதாகவும் வாரியம் குறிப்பிடுகிறது. இதனால் சிலை கரைப்பு என்பது வெறும் விழா நிறைவு நிகழ்வாக மட்டும் பார்க்காமல், சிலையின் தயாரிப்பு முதல் கரைப்பு வரை அதன் உண்மையான நோக்கத்தையும், சுற்றுச்சூழல் பாதுகாப்பையும் இணைத்துப் பார்க்க வேண்டிய நடைமுறையாக மாற வேண்டியுள்ளது. ஆன்மிக நம்பிக்கையும் சுற்றுச்சூழல் பாதுகாப்பும் ஒன்றுக்கொன்று எதிரானவை அல்ல. இயற்கையுடன் மீண்டும் கலப்பதே சிலை கரைப்பின் தத்துவமாகக் கருதப்பட்டால், அந்த இயற்கைக்கே பாதிப்பு ஏற்படாத வகையில் சிலையை உருவாக்குவதும், கரைப்பதும் அந்தத் தத்துவத்துடன் மேலும் பொருந்தக்கூடியதாக இருக்கும்.

எனவே, இனிவரும் காலங்களில் விநாயகர் சிலை தயாரிப்பில் இயற்கை மண் மற்றும் மக்கும் பொருட்களை அதிகம் பயன்படுத்துவது, இயற்கை வண்ணங்களைப் பயன்படுத்துவது, பிளாஸ்டிக் மற்றும் PoP போன்ற பொருட்களை தவிர்ப்பது, அரசு அறிவிக்கும் குறிப்பிட்ட இடங்களில் மட்டுமே சிலைகளை கரைப்பது ஆகியவை குறித்து விழிப்புணர்வு ஏற்படுத்த வேண்டியது அவசியமாகிறது. விநாயகர் சதுர்த்தியின் ஆன்மிகப் பாரம்பரியத்தையும், சுற்றுச்சூழல் பாதுகாப்பையும் ஒரே நேரத்தில் அடுத்த தலைமுறைக்கு கொண்டு செல்ல வேண்டும்.