புதுக்கோட்டை ஊருக்குள் அனைத்து பேருந்துகளும் வந்து செல்ல நடவடிக்கை எடுக்க வேண்டும் - பொதுமக்கள் கோரிக்கை

தூத்துக்குடி - திருநெல்வேலி தேசிய நெடுஞ்சாலையில் உள்ள புதுக்கோட்டை புதிய பாலத்தால் ஆயிரக்கணக்கான வாகனங்கள் செல்வதற்கு வசதி ஏற்பட்டிருக்கிறது என்றாலும் எங்களுக்கு போக்குவரத்து வசதிகள் தடைபட்டிருக்கிறது என்று புலம்புகிறார்கள் புதுக்கோட்டை மக்கள். 

தூத்துக்குடி ஊராட்சி ஒன்றியம் புதுக்கோட்டை பகுதியை சுற்றி சுமார் 60க்கும் மேற்பட்ட கிராமங்கள் இருக்கின்றன. பள்ளி, கல்லூரி மாணவ, மாணவியர் மற்றும் பொதுமக்கள் என்று ஏராளமானோர் இந்த ஊருக்கு வந்து செல்கின்றனர். எனவே இந்த ஊருக்கு அதிக அளவில் போக்குவரத்து வசதிகள் தேவைப்படுகிறது. அந்த வகையில் திருநெல்வேலி-தூத்துக்குடி இடையே இயக்கப்படும் பேருந்துகள் அனைத்தும் புதுக்கோட்டை பழைய பாலம் வழியாக புதுக்கோட்டை ஊருக்குள் வந்து சென்றன. ஊருக்கு வெளியில் தேசிய நெடுஞ்சாலை அமைக்கப்பட்ட பிறகு பாயிண்ட் டு பாயிண்ட் என்கிற இடைநில்லா பேருந்துகள் தவிர மற்ற பேருந்துகள் அனைத்தும் புதுக்கோட்டை ஊருக்குள் வந்து சென்றன. ஆனால் தற்போது தேசிய நெடுஞ்சாலையில் புதிதாக மேம்பாலம் கட்டி முடித்து பயன்பாட்டிற்கு வந்த பிறகு திருநெல்வேலியில் இருந்து தூத்துக்குடி நோக்கி செல்லும் எந்த பேருந்துகளும் புதுக்கோட்டை ஊருக்குள் வருவதில்லை. பேருந்துகள் புதுக்கோட்டை ஊருக்குள் வந்து செல்லும் வகையில் முறையான வசதிகள் செய்யப்படவில்லை. தூத்துக்குடியில் இருந்து நெல்லை, ஸ்ரீவைகுண்டம், சாயர்புரம் உள்ளிட்ட வழித்தடத்திற்கு செல்லும் பேருந்துகள் ஊருக்குள் வந்து செல்கின்றன. ஆனால் திருநெல்வேலி, ஸ்ரீவைகுண்டத்தில் இருந்து தூத்துக்குடி நோக்கி வரும் பேருந்துகள் புதுக்கோட்டை ஊருக்குள் வந்து செல்வதில்லை. நெல்லை, ஸ்ரீவைகுண்டத்தில் இருந்து வரும் பேருந்துகள் யூனியன் ஆபீஸ் அருகே அல்லது கீழக் கூட்டுடன்காடு செல்லும் வழியில் தேசிய நெடுஞ்சாலையிலேயே பயணிகளை இறக்கிவிட்டுவிட்டு செல்கின்றன. இது பகல் ஆனாலும் நள்ளிரவு ஆனாலும் அதே நிலைதான் இருந்து வருகிறது. மேலும், இரவு நேரத்தில் தூத்துக்குடியில் இருந்து நெல்லை நோக்கி செல்லும் பேருந்துகளும் புதுக்கோட்டை ஊருக்குள் வந்து செல்வதில்லை. நெடுஞ்சாலையில் பயணிகளை இறக்கிவிடுவதால், ஆபத்தான முறையில் குழந்தைகள் மற்றும் முதியவர்கள் நெஞ்சாலையை கடந்து புதுக்கோட்டை ஊருக்குள் வருகின்றனர். இதனால் பெரும் விபத்து ஏற்படும் சூழல் நிலவுகிறது.

இதற்கு நிரந்தர தீர்வாக புதுக்கோட்டை பழைய பாலத்தை புதுப்பிக்க வேண்டும் அல்லது அதன் அருகே புதிய பாலம் ஒன்றை கட்ட வேண்டும் என்று பொதுமக்களும், வியாபாரிகள் சங்கத்தினரும் தொடர்ந்து கோரிக்கை வைத்து வருகின்றனர். அவ்வாறு புதிய பாலம் கட்டப்படுமானால் அந்த வழியாக புதுக்கோட்டை ஊருக்குள் வந்து அங்கிருந்து சாயர்புரம், ஸ்ரீவைகுண்டம் மற்றும் திருநெல்வேலி வழித்தடங்களுக்கு பேருந்துகள் சென்று வர வசதியாக இருக்கும்.

இந்த திட்டம் நிறைவேறும் வரை தூத்துக்குடியில் இருந்து வரும் பேருந்துகள் தேசிய நெடுஞ்சாலையில் இருந்து முருகன் கோவில் வழியாக புதுக்கோட்டை ஊருக்குள் வந்து அங்கிருந்து சாயர்புரம், ஸ்ரீவைகுண்டம் மற்றும் திருநெல்வேலி உள்ளிட்ட ஊர்களுக்கு சென்று வருவதை அப்படியே இயக்க வேண்டும். அதுபோல் திருநெல்வேலி, ஸ்ரீவைகுண்டம் போன்ற பகுதிகளில் இருந்து தூத்துக்குடி நோக்கி செல்லும் பேருந்துகள் புதிய மேம்பாலத்தின் கீழ் பகுதி வழியாக புதுக்கோட்டை ஊருக்குள் வந்து, முருகன் கோவில் வழியாக தேசிய நெடுஞ்சாலையை அடைந்து, இடது புறமாக திரும்பி சற்று தூரம் வரை தேசிய நெடுஞ்சாலையில் சென்று, வலது புறமாக திரும்பி தூத்துக்குடி நோக்கி செல்லும்படி செய்ய வேண்டும். தற்காலிகமாக இந்த முறையில் பேருந்துகளை இயக்கினால் மட்டுமே அனைத்து பேருந்துகளும் புதுக்கோட்டை ஊருக்குள் வந்து செல்ல முடியும். பழைய பாலத்தில் புதிய பாலம் கட்டும்வரை இந்த முறையை பின்பற்றவேண்டும். தற்போது ஆம்னி பேருந்துகள் உள்பட பல வாகனங்கள் நாம் கூறும் இந்த வழியாகவும் சென்று வருகிறது என்பது குறிப்பிட தக்கது.