புதிய ஓய்வூதியத் திட்டம்: வரவேற்பும் விமர்சனமும் – அமலாக்கம் குறித்து தொடரும் கேள்விகள்

தமிழகத்தில் நிறுத்தப்பட்ட பழைய ஓய்வூதியத் திட்டத்தை (OPS) மீண்டும் அமல்படுத்த வேண்டும் என்ற கோரிக்கை பல ஆண்டுகளாக அரசு ஊழியர் சங்கங்களால் முன்வைக்கப்பட்டு வந்தது. கடந்த சட்டமன்றத் தேர்தலின் போது, இந்த விவகாரத்திற்கு தீர்வு காணப்படும் என திமுக தனது தேர்தல் வாக்குறுதியில் அறிவித்து தேர்தலை சந்தித்தது. தேர்தலில் வெற்றி பெற்று ஆட்சி பொறுப்பேற்று தற்போது நான்கு ஆண்டுகள் நிறைவடைந்துள்ள நிலையில், அரசு ஊழியர் சங்கங்கள் தொடர்ச்சியான போராட்டங்கள் மற்றும் கோரிக்கைகளை முன்வைத்து வந்தன.

இந்தச் சூழலில், தமிழக அரசு தற்போது புதிய ஓய்வூதியத் திட்டத்தை அறிவித்துள்ளது. ஓய்வு பெற்ற பின் அரசு ஊழியர்களுக்கு மாதாந்திர வருமான பாதுகாப்பு வழங்கும் வகையில் இந்தத் திட்டம் வடிவமைக்கப்பட்டுள்ளதாக அரசு தெரிவித்துள்ளது. மேலும், ஓய்வூதியத்தில் அரசின் பங்களிப்பு, குடும்ப ஓய்வூதிய பாதுகாப்பு உள்ளிட்ட அம்சங்கள் இதில் இடம்பெறும் என்றும் கூறப்பட்டுள்ளது.

அரசின் இந்த அறிவிப்பை பல அரசு அலுவலர் சங்கங்கள் வரவேற்றுள்ளன. நீண்ட காலமாக நிலுவையில் இருந்த ஓய்வூதிய விவகாரத்தில் அரசு ஒரு முடிவை எடுத்திருப்பது வரவேற்கத்தக்கது என்றும், முழுமையான பழைய ஓய்வூதியத் திட்டம் இல்லாவிட்டாலும் இது ஒரு முன்னேற்றமாக பார்க்கலாம் என்றும் அந்த சங்கங்கள் தெரிவித்துள்ளன.

அதே நேரத்தில், எதிர்க்கட்சிகள் மற்றும் ஒரு பகுதி அரசு ஊழியர் சங்கங்கள் இந்தத் திட்டத்தை விமர்சித்து வருகின்றன. தேர்தல் வாக்குறுதியில் கூறிய பழைய ஓய்வூதியத் திட்டம் இதுவல்ல என்றும், புதிய திட்டம் என்பது முந்தைய புதிய ஓய்வூதியத் திட்டத்தின் மாற்று வடிவமே என்றும் அவர்கள் குற்றம் சாட்டுகின்றனர். பழைய திட்டத்தில் இருந்த முழுமையான அரசு பொறுப்பு மற்றும் உறுதியான ஓய்வூதிய உரிமை இதில் இல்லை என்றும் விமர்சனங்கள் முன்வைக்கப்படுகின்றன.

இதற்கிடையே, சத்துணவு அமைப்பாளர்கள், அங்கன்வாடி பணியாளர்கள் உள்ளிட்ட சிறப்பு மற்றும் தொகுப்பூதிய பணியாளர் சங்கங்கள், புதிய ஓய்வூதியத் திட்டத்தில் தங்களுக்கு தெளிவான இடம் இல்லை என அதிருப்தி தெரிவித்துள்ளனர். அரசு தங்களை புறக்கணித்துவிட்டதாக குற்றம் சாட்டும் அவர்கள், இந்தத் திட்டம் எப்போது அமலுக்கு வரும், எந்த வகை ஊழியர்களுக்கு பொருந்தும், தற்காலிக மற்றும் பகுதி நேர பணியாளர்கள் இதில் சேர்க்கப்படுவார்களா என்பதற்கான விளக்கம் தேவை என வலியுறுத்துகின்றனர்.

பழைய ஓய்வூதியத் திட்டத்தில் ஊழியர் பங்களிப்பு இல்லாமல் கடைசி சம்பளத்தை அடிப்படையாகக் கொண்டு ஓய்வூதியம் வழங்கப்பட்ட நிலையில், புதிய அறிவிக்கப்பட்ட திட்டத்தில் பங்களிப்பு முறை மற்றும் விதிமுறைகள் முக்கிய பங்கு வகிக்கும் என கூறப்படுகிறது. இதனால், பழைய மற்றும் புதிய ஓய்வூதியத் திட்டங்களுக்கிடையேயான வேறுபாடுகள் குறித்து விவாதம் தீவிரமடைந்துள்ளது.

புதிய ஓய்வூதியத் திட்டத்தின் அமலாக்க தேதி, முழுமையான விதிமுறைகள், பயனாளிகள் பட்டியல் ஆகிய விவரங்களை அரசு தெளிவுபடுத்த வேண்டிய கட்டாயம் ஏற்பட்டுள்ளது. அதிகாரப்பூர்வ அரசாணை மற்றும் வழிகாட்டுதல்கள் வெளியான பின்னரே, இந்தத் திட்டம் உண்மையில் அரசு ஊழியர்களின் நீண்டகால நலனை பாதுகாக்கும் தீர்வா அல்லது அரசியல் வாக்குறுதிகளில் இருந்து விலகலா என்பது தெளிவாகும் என அரசியல் மற்றும் தொழிற்சங்க வட்டாரங்கள் கருத்து தெரிவிக்கின்றன.