திருப்பரங்குன்றம் தீபம் ஏற்றும் விவகாரம்: வரலாறுகளின் பின்னணியில் தீவிரமாகும் விவாதம்

மதுரை:22.12.2025

தமிழகத்தின் முக்கிய ஆன்மீகத் தலங்களில் ஒன்றான திருப்பரங்குன்றம் மலையில் தீபம் ஏற்றும் வழிபாட்டு நடைமுறை தொடர்பாக, தமிழக இந்து அறநிலைத்துறை மற்றும் இந்து முன்னணி உள்ளிட்ட இந்து அமைப்புகளிடையே கருத்து மோதல் நீடித்து வருகிறது. கடந்த சில நாட்களாக இந்த விவகாரம் அரசியல், சமூக மற்றும் மத வட்டாரங்களில் பெரும் விவாதத்தை ஏற்படுத்தி, மாநில அளவில் விஸ்வரூபம் எடுத்துள்ளது.

திருப்பரங்குன்றம் முருகன் கோயில் – வரலாற்றுப் பின்னணி

திருப்பரங்குன்றம், அருள் மிகு முருகனின் ஆறுபடை வீடுகளில் முதல் படைவீடு என புகழ்பெற்ற முருகன் திருத்தலமாகும். பழைய வரலாற்றின் அடிப்படையில், சூரபத்மனை வதம் செய்த பின், முருகப்பெருமான் தெய்வயானையை மணந்து அருள்பாலித்த தலமாக இது போற்றப்படுகிறது.

திருப்பரங்குன்றம் மலையின் மிக உச்சிப்பகுதியில் உள்ள தீபத்தூணில் பழங்காலங்களில் தீபம் ஏற்றப்பட்டு வந்ததாகவும், இடையில் அது நிறுத்தபட்டதாகவும் இந்து அமைப்புகள் மற்றும் ஆன்மீக அறிஞர்கள் தெரிவிக்கின்றனர். அந்த மரபை மீண்டும் நடைமுறைப்படுத்த வேண்டும் என்ற கோரிக்கை இந்து மக்களிடம் நீண்ட காலமாக இருந்து வருகிறது. இது குறித்த கோரிக்கையை ஏற்று, உயர் நீதிமன்றம் தீபத்தூணிலும், சமீபகாலமாக தீபம் ஏற்றி வந்த உச்சி பிள்ளையார் கோயிலும் தீபம் எற்றிக் கொள்ளலாம் என்று அனுமதி வழங்கியது. ஆனால், அந்த உத்தரவு முழுமையாக நடைமுறைப்படுத்தப்படவில்லை. இந்த விவகாரம் உச்சநீதிமன்றம் வரை சென்றிருக்கிறது. 

சிக்கந்தர் வழிபாட்டு பகுதி – வரலாற்றுக் குறிப்புகள்

திருப்பரங்குன்றம் மலையின் ஒரு பகுதியில், சிக்கந்தர் என அழைக்கப்படும் இஸ்லாமிய வழிபாட்டு தலம் (தர்கா) அமைந்துள்ளது. வரலாற்று ஆதாரங்களின்படி, இந்த பகுதி இஸ்லாமிய சமூகத்தினரால் வழிபாட்டுக்காக பயன்படுத்தப்பட்டு வருவதாக கூறப்படுகிறது. அந்த வழிபாட்டு தலத்தில், குறிப்பிட்ட நாட்களில் கொடி ஏற்றம் உள்ளிட்ட மரபு வழிபாடுகள் நடைபெறுவது வழக்கமாக இருந்து வருகிறது. தீப தூணியில் தீபம் ஏற்றும் விவகாரம் முடிவுக்கு வராத நிலையில் நேற்று இஸ்லாமியருக்கான பகுதியில் அவர்கள் கொடி ஏற்றுவதற்கு தமிழக அரசு துறை அனுமதி வழங்கியதுடன், காவல்துறை பாதுகாப்பும் அளிக்கப்பட்டதாக தகவல்கள் தெரிவிக்கின்றன.

ஆதரவு கருத்து (இந்து முன்னணி, பாஜக உள்ளிட்ட இந்து அமைப்புகள்)

திருப்பரங்குன்றம் முதன்மையாக முருகன் கோயிலை மையமாகக் கொண்ட ஆன்மீகத் தலம். நீதிமன்ற அனுமதி இருந்தும், தீபம் ஏற்றுவதை தடுப்பது மத உரிமைகளின் மீறலாகும். இந்து பக்தர்கள் மலை மீது ஏறுவதையே காவல்துறை தடுத்து வரும் நிலையில், மற்றொரு வழிபாட்டு பகுதியில் அனுமதி வழங்கப்படுவது பாகுபாடான அணுகுமுறை என்று குற்றம்சாட்டுகின்றனர். “ஒரே மலையில் இரண்டு வழிபாட்டு மரபுகள் இருந்தால், இரண்டுக்கும் சம உரிமை வழங்கப்பட வேண்டும்” என்பதே அவர்களின் வாதமாக உள்ளது.

எதிர்ப்பு மற்றும் அரசு தரப்பு விளக்கம்

இதற்கு மறுபுறம், தமிழக இந்து அறநிலைத்துறை மற்றும் அரசு தரப்பில், திருப்பரங்குன்றம் ஒரு மிக நுணுக்கமான, பல்வேறு மத மரபுகள் இணைந்த பகுதி. சட்டம்–ஒழுங்கு, பொது பாதுகாப்பு மற்றும் மத நல்லிணக்கம் கருதி கட்டுப்பாடுகள் விதிக்கப்பட்டுள்ளன. எந்த ஒரு மதத்துக்கும் எதிராக அரசு செயல்படவில்லை; அனைத்து நடவடிக்கைகளும் நிர்வாக விதிமுறைகள் மற்றும் சட்ட அடிப்படையிலேயே எடுக்கப்படுகின்றன என்று விளக்கம் அளிக்கப்பட்டுள்ளது. மேலும், சிக்கந்தர் வழிபாட்டு பகுதியில் அனுமதி வழங்கப்பட்டதும், அந்தப் பகுதியின் மரபு வழிபாட்டு நடைமுறையை கருத்தில் கொண்டே என அரசு தரப்பு தெரிவிக்கிறது.

அதிகரிக்கும் பதற்றம்

இந்த சூழ்நிலையில், திருப்பரங்குன்றம் தீபம் ஏற்றும் விவகாரம்,மத உரிமைகள், வரலாற்று மரபுகள், நீதிமன்ற உத்தரவின் அமலாக்கம், நிர்வாக சமநிலை என்ற பல கேள்விகளை மையமாகக் கொண்டு தீவிரமாக விவாதிக்கப்படுகிறது.

ஊடகங்களும் சமூகத்தின் எதிர்பார்ப்பும்

இந்த விவகாரத்தில், வரலாற்று உண்மைகள், இரு தரப்பு வாதங்கள் மற்றும் சட்ட நிலைப்பாடுகளை சமநிலையுடன் வெளிப்படுத்துவது ஊடகங்களின் முக்கிய பொறுப்பாக பார்க்கப்படுகிறது. மத நல்லிணக்கம் மற்றும் பொது அமைதி பாதிக்கப்படாமல், சட்டப்பூர்வமான மற்றும் பேச்சுவார்த்தை அடிப்படையிலான தீர்வு காணப்பட வேண்டும் என்பதே பொதுமக்களின் எதிர்பார்ப்பாக உள்ளது.