அமெரிக்கா–இஸ்ரேல்–ஈரான் பதற்றம்: ஜெய்சங்கர்–அராக்சி தொலைபேசி ஆலோசனை

மத்திய கிழக்கில் அமெரிக்கா, இஸ்ரேல் மற்றும் ஈரான் இடையே ஏற்பட்டுள்ள போர் பதற்றம் நாளுக்கு நாள் அதிகரித்து வரும் நிலையில், இந்தியா முக்கியமான தூதரக நடவடிக்கைகளை மேற்கொண்டு வருகிறது. இந்த போர் தொடங்கி தற்போது சுமார் 14 நாட்களை எட்டியுள்ள நிலையில், உலகளவில் அமைதி வேண்டுமென பல நாடுகள் வலியுறுத்தி வருகின்றன.

இந்த சூழ்நிலையில் இந்திய வெளியுறவுத்துறை அமைச்சர் Subrahmanyam Jaishankar மற்றும் ஈரான் வெளியுறவுத்துறை அமைச்சர் Abbas Araghchi ஆகியோர் தொலைபேசி மூலம் முக்கிய ஆலோசனையில் ஈடுபட்டனர். இருவரும் தற்போதைய போர் சூழல், பிராந்திய பாதுகாப்பு மற்றும் உலகளாவிய விளைவுகள் குறித்து விரிவாக கருத்துகளைப் பகிர்ந்துகொண்டதாக தகவல்கள் தெரிவிக்கின்றன.

பேச்சுவார்த்தையின் போது, ஈரான் தனது நாட்டை பாதுகாக்க மேற்கொண்டு வரும் நடவடிக்கைகள், தொடர்ச்சியாக நடைபெற்று வரும் தாக்குதல்களுக்கு அளித்து வரும் பதிலடி நடவடிக்கைகள் மற்றும் தற்போதைய போர்நிலை குறித்து அராக்சி, ஜெய்சங்கரிடம் விரிவாக விளக்கமளித்ததாக கூறப்படுகிறது.

மேலும், ஈரானுக்கு எதிராக நடைபெற்று வரும் தாக்குதல்களை உலக நாடுகள் கண்டிக்க வேண்டும் என்றும், சர்வதேச அரசியல் சூழலில் BRICS நாடுகளின் பங்கு மற்றும் முக்கியத்துவம் அதிகரித்து வருவதாகவும் அராக்சி தனது கருத்தை பகிர்ந்ததாகத் தெரிவிக்கப்படுகிறது.

இதற்கிடையில், பிராந்திய மற்றும் உலகளாவிய பாதுகாப்பு நிலைமை மேலும் பாதிக்கப்படாமல் இருக்க தூதரக முயற்சிகள் அவசியம் என்பதையும் ஜெய்சங்கர் வலியுறுத்தியதாக கூறப்படுகிறது. மத்திய கிழக்கில் நிலவும் பதற்றம் உலக பொருளாதாரம், குறிப்பாக எரிசக்தி விநியோகம் மற்றும் கடல் வர்த்தக பாதைகளில் தாக்கத்தை ஏற்படுத்தக்கூடும் என்பதால், அனைத்து தரப்பினரும் அமைதியான தீர்வை நோக்கிச் செல்ல வேண்டும் என இந்தியா தொடர்ந்து வலியுறுத்தி வருகிறது.

இந்த ஆலோசனை குறித்து தனது சமூக வலைதளமான X (Twitter) தளத்தில் பதிவிட்ட ஜெய்சங்கர், “ஈரான் வெளியுறவுத்துறை அமைச்சருடன் மீண்டும் தொலைபேசியில் பேசியேன். இருதரப்பு உறவுகள், தற்போதைய பிராந்திய நிலைமை மற்றும் BRICS தொடர்பான விடயங்கள் குறித்து விவாதித்தோம்” என்று குறிப்பிட்டுள்ளார்.

அமெரிக்கா, இஸ்ரேல் மற்றும் ஈரான் இடையே நடைபெற்று வரும் இந்த போர் பதற்றத்தின் நடுவில் இந்திய வெளியுறவுத்துறை அமைச்சர் ஈரானுடன் நேரடி ஆலோசனை நடத்தியிருப்பது சர்வதேச அரசியல் வட்டாரங்களில் முக்கியமான நடவடிக்கையாகக் கருதப்படுகிறது. இந்தியா பாரம்பரியமாக மத்திய கிழக்கு பிராந்தியத்தில் சமநிலை தூதரக அணுகுமுறையை கடைபிடித்து வருவது குறிப்பிடத்தக்கது.