போதைப் பொருள் கடத்தலின் “ஆரம்ப புள்ளி” எப்போது சிக்கும்? -பொதுமக்கள் எதிர்பார்ப்பு

சென்னை -தை 3(17.1.2026)

போதைப்பொருள் கடத்தலில் ஈடுபடுவோரை கண்டு பிடிக்க தமிழக அரசு தனிப்படைகள் அமைத்துள்ளது. இதன் மூலமாவது போதைப் பொருள் கடத்தலின் “ஆரம்ப புள்ளி” சிக்குவார்களா என்று பொதுமக்கள் கேள்வி எழுப்பி வருகின்றனர். 

தமிழகத்தில் கஞ்சா உள்ளிட்ட போதைப் பொருள் பயன்பாடு நாளுக்கு நாள் அதிகரித்து வருவது சமூகத்திற்கு பெரும் அச்சுறுத்தலாக மாறி வருகிறது. குறிப்பாக இளைஞர்கள், பள்ளி மற்றும் கல்லூரி மாணவர்கள் போதைப் பொருள் பழக்கத்தில் சிக்கி தவறான பாதைக்கு செல்லும் சம்பவங்கள் அதிகரித்து வருவதால், இதனை உடனடியாக கட்டுப்படுத்த வேண்டும் என்ற கோரிக்கை பல்வேறு தரப்பினரிடமிருந்தும் எழுந்து வருகிறது.

இந்த நிலையில், போதைப் பொருள் கடத்தலை தடுக்கும் நோக்கில் தமிழக காவல்துறை பல்வேறு நடவடிக்கைகளை மேற்கொண்டு வருகிறது. மாவட்ட அளவிலும், மாநில அளவிலும் தனிப்படைகள் அமைக்கப்பட்டு சோதனை நடவடிக்கைகள் தீவிரப்படுத்தப்பட்டுள்ளன. இருந்தபோதிலும், போதைப் பொருள் நடமாட்டம் முற்றிலுமாக கட்டுப்படுத்தப்படவில்லை என்பதே பொதுமக்களின் குற்றச்சாட்டாக உள்ளது.

போதைப் பொருள் கடத்தலில் ஈடுபடும் சிலர் கைது செய்யப்பட்டு, அவர்கள் மீது வழக்குகள் பதிவு செய்யப்பட்டு சிறையில் அடைக்கப்படுகின்றனர். ஆனால், இந்த கடத்தலின் மூல காரணமாக இருப்பவர் யார்? ஆரம்ப புள்ளி எங்கு உள்ளது? பின்னணியில் இயங்கும் பெரிய வலையமைப்பு யாருடையது? என்ற கேள்விகளுக்கு இதுவரை தெளிவான பதில் கிடைக்கவில்லை என்பதே சமூக ஆர்வலர்களின் ஆதங்கமாக உள்ளது.

பஸ், ரயில், விமான நிலையங்களில் கடத்தல் அதிகம்

கடந்த ஆண்டு மேற்கொள்ளப்பட்ட காவல்துறை ஆய்வில், போதைப் பொருள் கடத்தலுக்கு தனியார் வாகனங்களை விட மத்திய, மாநில அரசு பொது போக்குவரத்து வாகனங்கள் அதிக அளவில் பயன்படுத்தப்பட்டுள்ளன என்பது தெரியவந்துள்ளது. குறிப்பாக பஸ், ரயில் மற்றும் விமானம் வழியாகவே போதைப் பொருள் கடத்தல் அதிகமாக நடைபெறுகிறது என்பது காவல்துறைக்கு உறுதியாகியுள்ளது.

ஒடிசா, மணிப்பூர், ஆந்திரா உள்ளிட்ட மாநிலங்களில் இருந்து கஞ்சா சென்னை வழியாக இலங்கைக்கு கடத்தப்படுவதாகவும், கோவா, கர்நாடகா, பெங்களூரு, புதுச்சேரி உள்ளிட்ட பகுதிகளில் இருந்து மெத் ஆம்பெட்டமைன், கோகைன் போன்ற போதைப் பொருட்கள் தமிழகத்திற்குள் கொண்டு வரப்படுவதாகவும் தகவல்கள் வெளியாகியுள்ளன. நகரங்கள் மட்டுமின்றி, குக்கிராமங்களிலும் கஞ்சா பயன்பாடு அதிகரித்திருப்பது காவல்துறைக்கு கூடுதல் சவாலாக மாறியுள்ளது.

புதிய தனிப்படைகள் – முழுநேர கண்காணிப்பு

இதனை கருத்தில் கொண்டு, பஸ் நிலையங்கள், ரயில் நிலையங்கள் மற்றும் விமான நிலையங்களை கண்காணிக்க, ஒரு சப்-இன்ஸ்பெக்டர் தலைமையில் இரண்டு போலீசார் அடங்கிய தனிப்படைகள் அமைக்கப்பட்டுள்ளன. இந்த தனிப்படைகளின் முழுநேர பணியே, போதைப் பொருள் கடத்தலில் ஈடுபடும் நபர்களை கண்காணிப்பதும், சந்தேகத்திற்குரிய நடமாட்டங்கள் குறித்து தகவல்களை சேகரிப்பதும் ஆகும்.

இந்த தொடர் கண்காணிப்பு மூலம், கடத்தல் வலையமைப்பின் பின்னணியில் உள்ள முக்கிய நபர்கள், போதைப் பொருள் எங்கிருந்து வருகிறது, யார் யார் இதில் தொடர்புடையவர்கள் என்பதைக் கண்டறிய முடியும் என காவல்துறை நம்பிக்கை தெரிவித்து வருகிறது.

தாமதமான நடவடிக்கையா? – எழும் விமர்சனங்கள்

தமிழகத்தில் திமுக அரசு ஆட்சிப் பொறுப்பேற்று நான்கு ஆண்டுகளை கடந்துள்ள நிலையில், கடந்த மூன்று ஆண்டுகளுக்கும் மேலாக போதைப் பொருள் நடமாட்டம் அதிகரித்து வருகிறது என்ற குற்றச்சாட்டு தொடர்ந்து எழுந்து வந்தது. இதனை கட்டுப்படுத்த வேண்டும் என்ற கோரிக்கை வலுத்திருந்த போதிலும், 4,000-க்கும் மேற்பட்ட சம்பவங்கள் பதிவான பிறகே இத்தகைய அடிப்படை தனிப்படைகள் அமைக்கப்பட்டுள்ளன என்பது விமர்சனமாக முன்வைக்கப்படுகிறது.

இளைஞர் எதிர்காலம் – சமூகத்தின் கோரிக்கை

கஞ்சா உள்ளிட்ட போதைப் பொருட்கள் தமிழ்நாட்டின் எதிர்காலத்திற்கு பெரும் அச்சுறுத்தலாக இருப்பதாக பல ஆய்வுகள் சுட்டிக்காட்டுகின்றன. மாணவர்கள் போதைப் பொருள் பயன்பாட்டால் குற்றச்செயல்கள், வன்முறை, சமூக சீர்கேடு போன்றவற்றில் ஈடுபடுவது அன்றாட செய்திகளாக மாறியுள்ளது.

எனவே, பொது நலன் கருதி தமிழக அரசு தற்போது அமைத்துள்ள இந்த தனிப்படை, வீரியமிக்க, விளைவுடைமை கொண்ட அமைப்பாக செயல்பட்டு, போதைப் பொருள் கடத்தலின் ஆரம்ப புள்ளியையே கண்டறிந்து, ஒட்டுமொத்த வலையமைப்பையும் முற்றிலுமாக சிதைக்க வேண்டும் என்பதே பொதுமக்களின் எதிர்பார்ப்பாக உள்ளது. வளர்ந்து வரும் தலைமுறை இளைஞர்களை போதைப் பொருள் பிடியிலிருந்து காப்பாற்றி, நல்ல சமூகத்தை உருவாக்க வேண்டும் என்ற கோரிக்கையும் வலுத்து வருகிறது.