தமிழக அரசியல் களத்தில் அதிமுக, திமுக, பாஜக, நாம் தமிழர், பாமக, தமிழக வெற்றிக் கழகம் (தவெக) உள்ளிட்ட பல்வேறு அரசியல் கட்சிகள் தங்களது அரசியல் பயணத்தை தீவிரப்படுத்தி வருகின்றன. இந்தச் சூழலில், பாரதிய ஜனதா கட்சி (பாஜக) ஆர்.எஸ்.எஸ் (ராஷ்ட்ரிய ஸ்வயம் சேவக் சங்கம்) சித்தாந்தத்தின் அடிப்படையில் செயல்படுகிறது என்ற குற்றச்சாட்டு மற்றும் அதற்கான ஆதரவு–எதிர்ப்பு கருத்துகள் தமிழக அரசியலில் மைய விவாதமாக மாறியுள்ளது.
ஒருபுறம், பாஜக மற்றும் இந்துத்துவா சார்ந்த தரப்புகள் “ஆர்.எஸ்.எஸ் இந்திய கலாச்சாரம், தேசபற்று, ஒழுக்கம், சேவை ஆகியவற்றை அடிப்படையாகக் கொண்ட தேசிய இயக்கம்” என வலியுறுத்துகின்றன. மறுபுறம், திமுக, காங்கிரஸ், விடுதலைச் சிறுத்தைகள் உள்ளிட்ட எதிர்க்கட்சிகள் “ஆர்.எஸ்.எஸ் அரசியல் ரீதியாக பிளவுபடுத்தும், ஜனநாயகத்திற்கு முரணான சிந்தனையை பிரதிபலிக்கிறது” என கடுமையாக விமர்சிக்கின்றன.
அரசியல் குற்றச்சாட்டுகள் – புதிய சர்ச்சை
சமீபத்தில், விடுதலைச் சிறுத்தைகள் கட்சி தலைவர் திருமாவளவன், நாம் தமிழர் கட்சி ஒருங்கிணைப்பாளர் சீமான் மற்றும் தமிழக வெற்றிக் கழகம் தலைவர் விஜய் ஆகியோர் ஆர்.எஸ்.எஸ் வழிகாட்டலின் அடிப்படையில் செயல்படுகின்றனர் என்று குற்றம் சாட்டியிருப்பது அரசியல் வட்டாரங்களில் பெரும் விவாதத்தை ஏற்படுத்தியுள்ளது.இதனைத் தொடர்ந்து, “ஆர்.எஸ்.எஸ்-ஐ ஆதரிப்பது அல்லது அதன் சித்தாந்தத்தைப் பேசுவது அவ்வளவு பெரிய தவறா?”,“ஆர்.எஸ்.எஸ் உண்மையில் என்ன இயக்கம்?”,“இந்திய தேசத்திற்கு ஏற்ற சிந்தனையா, அல்லது நிராகரிக்க வேண்டிய சித்தாந்தமா?”என்ற கேள்விகள் பொதுமக்கள் மத்தியில் எழுந்துள்ளன. சமூக வலைதளங்களில் இதுகுறித்த தேடல்களும் விவாதங்களும் அதிகரித்து வருகின்றன.
ஆர்.எஸ்.எஸ் – ஒரு பார்வை
1925ஆம் ஆண்டு டாக்டர் கே.பி. ஹெட்கேவார் தொடங்கிய ஆர்.எஸ்.எஸ், தன்னை அரசியல் கட்சி அல்ல, சமூக–பண்பாட்டு தேசிய இயக்கம் என வரையறுக்கிறது.தேசிய ஒருமைப்பாடு, சுயக்கட்டுப்பாடு, ஒழுக்கம், சேவை, இந்திய கலாச்சார அடையாளம் ஆகியவற்றை வலியுறுத்துவது அதன் அடிப்படை நோக்கங்களாக கூறப்படுகிறது.பேரிடர் நிவாரணம், கல்வி, சுகாதாரம் போன்ற சமூக சேவைப் பணிகளில் ஈடுபடுவதாகவும் அதன் ஆதரவாளர்கள் தெரிவிக்கின்றனர்.
எதிர்க்கட்சிகளின் நிலைப்பாடு
தமிழகத்தில் நாஸ்திகம், சமூகநீதி, பன்முகத்தன்மை ஆகியவற்றை பேசும் திமுக, விடுதலைச் சிறுத்தைகள் உள்ளிட்ட கட்சிகள்,“ஆர்.எஸ்.எஸ் மற்றும் இந்துத்துவா ஒரே அடையாள அரசியலை முன்னிறுத்துகின்றன; இது இந்தியாவின் பன்முக சமூக கட்டமைப்புக்கு எதிரானது” என வாதிடுகின்றன.அதனால், ஆர்.எஸ்.எஸ் குறித்த விமர்சனங்களை தொடர்ந்து முன்வைத்து வருகின்றன.
அம்பேத்கர் – ஆர்.எஸ்.எஸ் – இந்துத்துவா: புதிய விவாதம்
இந்த விவாதத்திற்கு மேலும் வலு சேர்க்கும் வகையில், டாக்டர் பி.ஆர். அம்பேத்கர் தொடர்பான கருத்துகள் அரசியல் களத்தில் முன்வைக்கப்படுகின்றன.
ஆர்.எஸ்.எஸ் ஆதரவு தரப்பினர் கூறுவதாவது: அம்பேத்கர் ஆர்.எஸ்.எஸ்-ஐ நேரடியாக எதிர்த்ததாக எந்த உறுதியான பதிவும் இல்லை,இந்துத்துவாவையும் அவர் வெளிப்படையாக எதிர்த்ததாக தெளிவான ஆதாரம் இல்லை,மகாத்மா காந்தி கொலைக்குப் பிறகு இந்திய அரசு ஆர்.எஸ்.எஸ்-ஐ தடை செய்தபோது,“ஆதாரம் இன்றி ஒரு அமைப்பைத் தடை செய்வது ஜனநாயகத்திற்கு எதிரானது” என அம்பேத்கர் கண்டனம் தெரிவித்ததாக கூறப்படுகிறது.அம்பேத்கர் இந்து சமூகத்தில் உள்ள சாதி ஒடுக்குமுறையை கடுமையாக விமர்சித்தார் என்பது அனைவரும் ஏற்றுக்கொள்ளும் உண்மை.ஆனால், அதனை அடிப்படையாகக் கொண்டு, “அம்பேத்கர் இந்துத்துவாவையும் ஆர்.எஸ்.எஸ்-ஐயும் எதிர்த்தார்” என்று கூறுவது அரசியல் வசதிக்காக செய்யப்படும்(interpretation) என ஆர்.எஸ்.எஸ் ஆதரவாளர்கள் வாதிடுகின்றனர்.
திருமாவளவன் மீது முன்வைக்கப்படும் விமர்சனம்
அம்பேத்கரை அரசியல் சிந்தனையின் அடையாளமாக முன்வைக்கும் திருமாவளவன்,ஆர்.எஸ்.எஸ் மற்றும் இந்துத்துவாவை கடுமையாக எதிர்ப்பது குறித்து,“இது இந்து சமுதாயத்தைத் தவிர்த்து, கிறித்தவ மற்றும் இஸ்லாமிய சமூக ஆதரவை வலுப்படுத்தும் அரசியல் அணுகுமுறை” என்ற விமர்சனமும் எழுந்துள்ளது.இதற்கு பதிலளிக்கும் வகையில், விடுதலைச் சிறுத்தைகள் தரப்பு,“சிறுபான்மையினர் உரிமை மற்றும் சமூகநீதியை பாதுகாப்பதே தங்களது அரசியல்” என்று கூறுகிறது.
ஆர்.எஸ்.எஸ் ஆதரவாளர்கள், மதம், ஜாதி, மொழி என வேறுபாடு பார்க்காமல் “இந்தியன்” என்ற ஒரே அடையாளத்தில் அனைவரையும் பார்க்கும் இயக்கமே ஆர்.எஸ்.எஸ் சேவை பணிகளில் எந்த மத, ஜாதி பாகுபாடும் இல்லை என்று வலியுறுத்துகின்றனர். தேர்தல் நெருங்கும் நிலையில்…வரவிருக்கும் தேர்தலை முன்னிட்டு,ஆர்.எஸ்.எஸ் – இந்துத்துவா – அம்பேத்கர் – சமூகநீதி என்ற விவாதங்கள் தமிழக அரசியலில் மேலும் தீவிரமடையும் என அரசியல் நோக்கர்கள் கருதுகின்றனர்.இந்த கருத்துப் போர்,பாஜக – அதிமுக கூட்டணிக்கு சாதகமாக மாறுமா?அல்லது எதிர்க்கட்சிகளின் சமூகநீதி அரசியலை வலுப்படுத்துமா?என்பது தேர்தல் முடிவுகளில்தான் தெளிவாகும் என கூறப்படுகிறது.
முடிவாக…
ஆர்.எஸ்.எஸ் நன்மை செய்யும் தேசிய இயக்கமா, அல்லது மக்களைப் பிரிக்கும் அரசியல் சிந்தனையா?அம்பேத்கரை முன்வைத்து ஆர்.எஸ்.எஸ்-ஐ எதிர்ப்பது சித்தாந்தமா, அரசியலா?இந்த கேள்விகளுக்கான பதில்கள் அரசியல் நிலைப்பாட்டைப் பொறுத்து மாறினாலும், தமிழக அரசியலில்.. வரவிருக்கும் தேர்தலில்..இந்த விவாதம் முக்கிய தாக்கத்தை ஏற்படுத்தும் என்பதில் மாற்றுக் கருத்தில்லை.
nadunilai.com
