திருப்பரங்குன்றம் தீபம் விவகாரம் - அவமதிப்பு வழக்கில் தமிழக அதிகாரிகள் நிபந்தனையற்ற மன்னிப்பு

மதுரை அருகே உள்ள திருப்பரங்குன்றம் மலை மீது கார்த்திகை தீபம் ஏற்றுதல் தொடர்பாக தொடரப்பட்ட நீதிமன்ற அவமதிப்பு வழக்கில், தமிழக அரசின் உயர் அதிகாரிகள் மதுரை கிளை உயர் நீதிமன்றத்தில் நிபந்தனையற்ற மன்னிப்பு கோரினர்.

திருப்பரங்குன்றம் மலை உச்சியில் பாரம்பரியமாக தீபம் ஏற்ற அனுமதிக்க வேண்டும் எனக் கோரி தாக்கல் செய்யப்பட்ட வழக்கில், ஏற்கெனவே நீதிமன்றம் தெளிவான உத்தரவை பிறப்பித்திருந்தது. ஆனால், அந்த உத்தரவை முழுமையாக அமல்படுத்தாமல், சட்டம் ஒழுங்கு காரணங்களை முன்வைத்து பிரிவு 144 தடை உத்தரவை நிர்வாகம் பிறப்பித்ததாக குற்றச்சாட்டு எழுந்தது. இதனையடுத்து சம்பந்தப்பட்ட அதிகாரிகளுக்கு எதிராக நீதிமன்ற அவமதிப்பு வழக்கு தொடரப்பட்டது.

இந்த வழக்கு விசாரணைக்கு வந்த போது, மதுரை மாவட்ட ஆட்சியர் K.J. பிரவீன் குமார்,மதுரை மாநகர காவல் ஆணையர் J. லோகநாதன்,துணை காவல் ஆணையர் A.G. இனிகோ திவ்யன், திருப்பரங்குன்றம் சுப்பிரமணிய சுவாமி கோயில் செயல் அலுவலர் யாக்னா நாராயணன் உள்ளிட்ட அதிகாரிகள் நீதிமன்றத்தில் ஆஜராகி,“நீதிமன்ற உத்தரவை அவமதிக்கும் நோக்கம் எங்களுக்கில்லை. சமூக அமைதி கருதி எடுத்த நிர்வாக நடவடிக்கைகள் தவறாக புரிந்துகொள்ளப்பட்டுள்ளன” என விளக்கம் அளித்து நிபந்தனையற்ற மன்னிப்பு கோரினர்.

வழக்கை விசாரித்த நீதிபதி G.R. சுவாமிநாதன், அதிகாரிகள் தெரிவித்த மன்னிப்பை பதிவுசெய்தாலும், நீதிமன்ற உத்தரவுகளை மீறி பிரிவு 144 போன்ற தடைகள் விதிப்பது ஏற்றுக்கொள்ள முடியாதது என கடும் கண்டனம் தெரிவித்தார். குறிப்பாக, மாவட்ட ஆட்சியரின் பங்கு தொடர்பாக தனிப்பட்ட முறையில் விளக்கம் அளிக்க வேண்டிய அவசியம் இருப்பதாகக் கூறிய நீதிபதி, மற்ற அதிகாரிகள் மீதான விசாரணையையும் தொடர உத்தரவிட்டார்.

இதனிடையே, நீதிமன்ற உத்தரவுகளை நிர்வாக அதிகாரிகள் எந்தச் சூழலிலும் முழுமையாகப் பின்பற்ற வேண்டும் என்றும், சட்டம் ஒழுங்கு காரணங்களை முன்வைத்து நீதித்துறை உத்தரவுகளை புறக்கணிக்க முடியாது என்றும் நீதிபதி தெளிவுபடுத்தினார். இந்த வழக்கின் அடுத்த கட்ட விசாரணை மார்ச் 2, 2026 அன்று நடைபெறும் என நீதிமன்றம் அறிவித்துள்ளது. 

திருப்பரங்குன்றம் தீபம் வழக்கு, நிர்வாக அதிகாரிகளின் அதிகார எல்லை, நீதித்துறையின் மேன்மை மற்றும் மத வழிபாட்டு உரிமை ஆகியவை தொடர்பான முக்கிய வழக்காக தற்போது அரசியல் மற்றும் சமூக வட்டாரங்களில் கவனம் பெற்றுள்ளது.